Maestra gidunggab sa kapuyo

CEBU, Philippines - Kritikal karon ang kahimtang sa usa ka maestra sa dakbayan sa Lapu-Lapu dihang gidunggab siya sa iyang kapuyo sa makadaghan nga higayon kay nagtoo nga siya ang nagtago sa simpak sa iyang cellphone.

Si Rachel Wagwag, 36, dalaga ug nagpuyo sa Sitio Sunrise, Barangay Gun-ob, Dakbayan sa Lapu-Lapu nakaangkon og daghang dinunggaban agi sa ice pick ug anaa karon sa ospital.

Ang midunggab ni Wagwag mao si Dante Barral, 35, ulitawo ug giingong kapuyo sa maestra.

Base sa imbestigasyon ni PO1 Jade Quirubin nasayran nga kaniadtong Martes sa buntag nangita si Barral sa iyang simpak ug misulod kini sa lawak sa maestra.

Ang duha nagkalalis dihang ang maestra nanghimakak nga anaa kaniya ang simpak ni Barral.

Matud pa nga gisirado ni Barral ang pultahan sa lawak ug gikuot ang gidala niining "ice pick" ug gidunggab ang maestra. Ang suspek dali nga miikyas samtang ang maestra gidala sa Lapu-Lapu District Hospital.

Nasuta sa kapolisan nga adunay daang panagsungi sila si Wagwag ug Barral. – (BongSoriano/RUB)

Lalaki nga miambak sa Mactan Bridge namatay

Napalgang patay na kadtong lalaki nga miambak sa Mactan-Mandaue Bridge sa Barangay Looc, dakbayan sa Mandaue apan nagpabilin nga wala pa gayud mailhi.

Ang patay’ng lawas nga napalgang naglutaw duol sa dagko nga tangke sa gasolina duol sa taytayan anaa sa Rolling Hills Homes sa dalan A. S. Fortuna, Barangay Banilad, dakbayan sa Mandaue.

Ang kapolisan gipahibalo sa gwardiya sa Petron Depot nga adunay naglutaw nga patay’ng lawas duol sa gibantayan niya nga fuel depot.

Nasuta sa kapolisan nga ang patay’ng lawas nga napalgan mao kini ang miambak sa Mactan-Mandaue Bridge kaniadtong Lunes sa gabii.

Usa ka Leopoldo Savellano nga nagpuyo sa Barangay Looc miingon nga samtang diha siya sa usa ka tindahan iyang nakita ang usa ka lalaki nga mitungtong sa puthaw nga barandilyas sa taytayan ug miambak.

Dihang nagtampasaw na ang tawo sa dagat ilang nakita nga taud-taod milutaw ug naglangoy. Dunay mga tawo nga miitsa’g pisi apan wala kini panumbalinga sa maong tawo ug taud-taud mitidlom.

Gibana-bana sa kapolisan nga ang patay’ng lawas anaa kini sa 40 ngadto sa 50 anyos, nagsul-ob og polo shirt ug itom nga karsones. Sa dughan adunay patik nga Lorrie Mea. (/RUB)(BANAT NEWS)