Nanglungkab naaresto sa mga gwardiya

CEBU, Philippines - Nadakpan sa mga gwardiya ang usa ka 37-anyos nga lalaki kinsa giingong nanglungkab kagahapon sa buntag didto sa Gorordo Avenue, barangay Kamputhaw, dakbayan sa Sugbo.

Ang gidakop mao si Joemar Maalam, taga Barangay Ermita nga gitumbok nga maoy nanglungkab sa Coffee Dream ug gisikop sa mga gwardya nga sila si Juniver Lowaton ug Ardy Luna.

Ang duha ka gwardiya mibutyag ngadto sa kapolisan nga samtang nag-roving sila ilang nakita si Maalam nga nagbitbit og usa ka computer monitor gikan sa balay-patigayon.

Midagan ang suspek mao nga nahitabo ang ginukdanay ug gibiyaan ni Maalam ang computer monitor.

Usa ka polis ang nakakita ug mitabang pagdakop ni Maalam nga anaa gitanggong karon sa karsel sa Camp Sotero Cabahug samtang giandam na ang ipasaka nga kaso batok kaniya.  - /RUB (BANAT NEWS)