Lalaki patay sa hit and run

CEBU, Philippines - Patay ang usa ka lalaki human kini mabangga-i og Town Ace nga sakyanan nga giingong kusog kaayo ang dagan didto sa barangay Poblacion, lungsod sa Badian kaniadtong Biyernes sa gabii.

Ang biktima naila nga si Ronnie Otoc, 28, molupyo sa barangay Basak, Badian.

Base sa imbistigasyon sa kapolisan nga sa wala pa mahitabo ang insidente ang biktima ug ang inahan sa iyang kapuyo nagkuyog og labang diha sa karsada.

Ang Town Ace nga dunay plakang YVB-848 mibangga ngadto kang Otoc hinungdan sa pagkalabay sa biktima ngadto sa karsada.

Ang inahan sa kapuyo ni Otoc swerte kay nakalikay sa nahisgutang sakyanan.

Ang maong sakyanan wala mohunong ug mipadayon gihapon sa pagdagan paingon sa lungsod sa Alegria.

Si Otoc kinsa nakaangkon  og grabeng kadaot sa iyang lawas dali nga gihatod sa mga estambay didto sa Badian District Hospital apan pipila ka oras ang nakalabay ang biktima nakabsan gyud sa iyang kinabuhi.

Ang mga estambay mao usab ang mi-report sa insidente ngadto sa kapolisan.

Pipila ka minutos ang nakalabay napalgan sa kapolisan ang Town Ace nga gi-abandonar didto sa Sitio Gusa, Barangay Madridejos, Badian. - /BDB (BANAT NEWS)