Mga ‘kawatan’ nangadakpan

CEBU, Philippines - Nasikop sa kapolisan sa dakbayan sa Sugbo ang usa ka bayot nga nalambigit sa pipila ka insidente sa kawat ug lungkab sa dakbayan dihang naabtan kini diha sa dalan Magsaysay sa barangay Pasil sa dakbayan sa Sugbo.

Ang nasikop naila nga si Rolando Sabalandi alias “Andot Bayot”, taga Opra Village, barangay Kalunasan, sa dakbayan sa Sugbo.

Si SPO2 Jeffrey Diola sa City Intelligence Branch sa Cebu City Police Office miingon nga nakadawat siya og taho nga nasigpatan sa dalan Magsaysay ang maong suspek nga duna nay warrant of arrest sa kasong robbery. Dihang giadto ni Diola, nakit-an niya kini sa lugar ug gidiretso og dakop subay sa warrant of arrest nga giluwatan ni Regional Trial Court (RTC) Judge Rafael Yrastorza.

Matud pa sa Deputy chief sa CIB nga si Sr. Insp. Wayne Magbanua daghang silingan sa suspek ang mireklamo niini tungod kay mao kini ang magsige og panglungkab sa ilang dapit.

Giangkon hinuon sa suspek ang mga pasangil apan gihimakak niyang tiggamitan siya og illegal nga drugas human dunay nakuhang usa ka pakete nga shabu sa iyang bulsa atol sa pagkasikop kaniya.

Nasikop  usab ang usa ka lalaki sa mga silingan niini tungod sa pagpangawat og gas range ug tangke sa gasolina sa Ayala Access Road sa barangay Hipodromo pasado alas -10 sa miaging buntag.

Ang nasikop naila nga si Cecilio Getubig Jr, 30, kasamtangan nga nagpuyo sa Ayala  Access Road apan lumad nga taga Mandaue.

Dihang nahinabi sa tigbalita ang maong suspetsado miangkon kini nga nangawat siya ug miingon kini nga dili lang kadto ang unang higayon nga nangawat siya gani napriso na siya kaniadto sa samang kaso.

Sa laing bahin, nawad-an sa iyang duha ka lap top nga nagkantidad tanan og P50, 000 ug pitaka nga adunay sulod nga P30,000  ang usa ka Korean nga mi-parking sa iyang sakyanan sa dalan M. Logarta ug eskina E. Perez, barangay Subangdaku, dakbayan sa Mandaue sa miaging gabii.

Giila ni PO3 Henry Lugo sa kapolisan sa Presinto 3 ang  biktima nga mao si Sungsu Son, 43,  taga Inchon, South Korea ug nagpuyo sa Dumlog, dakbayan sa Talisay.

Matud pa ni PO3 Lugo,  gibilin sa biktima ang iyang sakyanan sa daplin sa dalan sa maong lugar tungod kay duna siya gipakigkitaan sa dapit apan sa iyang pagbalik nahanaw na ang maong mga butang nga naglakip ang iyang passport.

Nagtuo ang kapolisan nga nakalimtan pagsira sa biktima ang iyang sakyanan tungod kay wala may timailhang gilungkab kini. (/EIM)(BANAT NEWS)