Dako og natampo sa siyudad pasidunggan

CEBU, Philippines - Saulogon karong adlawa ang ika-77th Charter Day sa siyudad sa Sugbu agi’g paghatag pasidungog kang anhing Don Vicente Rama nga maoy amahan sa Cebu City Charter.

Niadtong Pebrero 24,1937, ang Cebu nahimong independent chartered city pinaagi sa Commonwealth Act No.58 sa inisyatiba ni Don Vicente Rama.

Dunay himuong floral offering ngadto sa monumento ni Don Vicente, sa atubangan sa Bureau of Fire Protection sa Natalio Bacalso Avenue.  Samtang, ipahigayon usab ang pagpasidungog sa  pipila ka indibidwal nga dako ang natampo sa kabilin ug kalamboan sa syudad sa Sugbo nga anha ipahigayon sa Marco Polo Hotel karong gabii. Ang Aboitiz Foundation (humanitarian service), Jumalon Butterfly Sanctuary (environment) ug University of the Visayas chorale (culture and arts) nalakip sa mga pasidunggan isip Outstanding Institutions.  Samtang pasidunggan isip outstanding individual mao sila Atty. Augustus Go (education and philanthropy), Francis Monera (business and industry), Virginia Vamenta (media), Resil Mojares (journalism) ug Capt. Vicente Sejoco (military service).

Hatagan usab og lifetime service award si Archbishop Emeritus Ricardo Cardinal Vidal tungod sa kadako  sa iyang nahimong papel paggiya sa mga Sugbuanon isip pangulo sa Simbahan dinhi.

Samtang, sila Col. Manuel Segura (1919-2013) ug Atty. Esperanza Valenzona (1917-2014) ang pasidunggan og Posthumous Award.  Si Segura usa ka war veteran nga mitabang sa giyera batok sa mga Hapon nga misakop sa Sugbo. Siya ang nagsulat sa Tabunan: The Untold Story of the Famed Cebu Guerillas of World War II ug ang The Koga Papers.

Samtang, si Valenzona, ang pangulo sa Share-A-Child Movement, usa ka non-government organization nga mitabang sa mga kabus niadtong 1990s. (/EIM)(BANAT NEWS)