Giaway sa asawa naghikog
CEBU, Philippines - Patay ang usa ka bana human naghikog kay gidudahang nahiubos nga giaway sa asawa kay hubog ug nawagtang na ang iyang pitaka nianang Valentine’s Day didto sa Sitio San Jose, Barangay Labogon, dakbayan sa Mandaue.
Ang namatay mao si Rodrigo Panlo Jr., 42, minyo nga nagtrabaho isip casual nga kawani sa City Health Office (CHO) sa Mandaue ug nagpuyo sa nahisgotang dapit.
Si SPO2 Danilo Barrita, sakop sa Presinto 3 sa Mandaue City Police Office (MCPO), miingon nga nahibaw-an sa mga imbestigador nga nianang sayo sa buntag si Panlo giaway sa asawa nga si Geraldine tungod kay hubog na nga mipauli sa Pebrero 14 ug nawagtang na ang pitaka niini nga adunay sulod nga kuwarta.
Matud pa nga milakaw ang asawa kay nanglaba ug gibiyaan ang bana nga nag-inusara, apan sa pagpauli ni Geraldine nianang pagka hapon nadiskubrehan na lamang niini nga nagbitay na kini sulod sa ilang lawak.
Si Barrita miingon nga gidala sa Eversley Child Sanitarium General Hospital si Panlo apan gideklarar kini sa mga doktor nga Dead on Arrival. (BANAT NEWS)
- Latest
