Laing suspek pagpatay unta sa bise mayor dakpan
CEBU, Philippines - Laing suspetsado sa giingong pagtinguha pagpatay ni Asturias Vice Mayor Joel Dumdum nasikop na usab sa mga sakop sa Cebu PNP Provincial Intelligence Branch atul sa follow-up operation nga ilang gihimo sa miaging adlaw.
Ang nasikop mao si Archie Alvarado, hingkod ang panuigon nga naaktuhang naghithit og ginadiling druga didto sa iyang panimalay sa barangay Looc Norte.
Matud ni Supt. Rodolfo Albotra, hepe sa PIB, nga si Alvarado ang nagsilbing spotter sa planong pagpatay ni Dumdum ug gikataho usab nga suspetsado nga “gun for hire.â€
Sumala pa ni Albotra nga nakahibalo gyud si Alvarado sa maong plano sanglit didto sa ilang balay sa barangay Looc Norte nagtambay ang mga suspetsado ug didto gibuhat ang plano.
Matud sa kapolisan nga si Alvarado nakuhaan og kalibre .45 nga pistola ug magazine nga puno sa bala, tulo ka reserba nga magazine sa AR 15 nga armas, kabhang sa bala, duha ka karton sa bala ug drug paraphernalia.
Gidala sa mga polis si Alvarado sa PNP Crime Laboratory Service-7 aron ipa-drug test.
Si Alvarado nagtingkagol karon sa Consolacion Police Station samtang nagpaabot sa kaso nga ipasaka batok kaniya. (Marjorie Caballero USJR Intern/RUB (BANAT NEWS)
- Latest
