Lumad Basakanon, Placereños milangkat sa unang ganti sa Sinulog Grand Parade

CEBU, Philippines - Ang Sugboanong Lumad-Basakanon ug ang mga mananayaw gikan sa Masbate maoy nanghawod sa gipahigayong Sinulog Grand Parade karong tuiga pahinungod sa kapistahan ni Senyor Santo Niño.

Sa makausa pa gipakita sa mga mananayaw sa Barangay Basak-San Nicolas nga dili sila mabintahaan sa pagsayaw bisan pa sa ubang mananayaw nga gikan sa ubang lugar sa nasud.          Ang Lumad-Basakanon maoy nakakuha sa first prize alang sa Free-Interpretation category ug sa Street Dancing category, ug Best in Costumes samtang ang Kulturang Placereño sa Masbate mao usab ang first prize sa Sinulog-based category. Si Mayor Michael Rama nahinangop kaayo nga ang Lumad-Basakanon maoy nakadaug sa Street Dancing ug Free-Interpretation bisan og kuwang sila og kagamitan alang sa pasundayag.

Matud ni Rama nga gitan-aw g’yud sa mga maghuhukom ang nindot nga pag-arte sa pagsayaw sa mga contingents. Ang mga maghuhukom nga gigamit sa Sinulog Foundation Inc. dili taga Sugbo.

Gibutyag ni Dolly Suzarra nga maoy project director sa Sinulog Foundation nga ang mga judges sa dancing category gikan sa Cultural Center of the Philippines ug sa National Commission for the Culture and Arts nga atoa magbase sa Manila.

Ang mga mananaug sa Sinulog Grand Parade 2014 mao kini:

Best in Street Dancing

1st place: Lumad Basakanon, Brgy. Basak San Nicolas

2nd place: Sinanduloy Cultural Troupe, Tangub City

3rd place: Kulturang Placereño, Masbate

Free Interpretation Category

1st place: Lumad Basakanon, Brgy. Basak San Nicolas

2nd place: Tribu Himag-ulaw, Placer Masbate

3rd place: Abellana National School

4th place: Tribu Subanen, Plaridel Misamis Occidental

5th place: Banay Talambanon, Talamban Elementary School

Sinulog-based Category

1st place: Kulturang Placereno, Masbate

2nd place: Tribu Sinanduloy, Tangub City

3rd place: Municipality of Tuburan, Tuburan National High School

4th place: Carcar City Division

5th place: Talisay City Central Elementary School

Matud ni Mayor Rama nga hisgutan pa nila kun maayo ba nga pasalmoton nila ang Lumad-Basakanon sa Aliwan Festival sa Manila diin kaniadto maoy nahimo na nga Hall of Famer tungod kay nahimo kini nga grand champion sa tulo ka sunod-sunod nga higayon.  (/EIM)(BANAT NEWS)