Re-routing, clearing atol sa Sinulog Grand Parade

CEBU, Philippines - Laing re-routing na sab ang pagahimuon sa Cebu City Traffic Operations Management (CITOM) alang sa Fiesta Señor Sto. Niño Grand Sinulog Parade 2014 karong adlaw nga Domingo ug ang mga dalan sirad-an sugod alas -5 sa buntag.

Kini himuon sa Carousel Route sa Grand Sinulog Parade, gikan sa New Imus Road, diretso sa M.J. Cuenco Ave., moliko sa wala sa Gen. Maxilom Ave., hangtod sa Fuente Osmeña, moliko sa Osmeña Blvd., hangtod na sa Cebu City Sports Complex, moliko sa tuo R.R. Landon St., moliko sa Entrance Gate sa Cebu City Sports Center moagi sa Sinulog Grandstand  ug sa Exit Gate sa P. del Rosario St., moliko sa tuo sa N. Bacalso Ave., mo-U-turn atubangan sa Citilink Terminal, moagi sa N. Bacalso Ave., hangtod na sa P. del Rosario St., ug mobalik na sa New Imus Road. Adunay luna nga gitagana alang sa pag-parking sa mga private vehicles sa SRP area duol sa St. Pedro Calungsod Templete. Ilabi na kadtong manimba, apan gisugyot sa CITOM nga mas maayong di na lang sila magdala pa og sakyanan.

Gipahibalo usab daan ni Joy Tumulak, operations officer sa CITOM nga sa alas-10 pa lang unyang gabii magsugod na sila og clearing sa kadalanan nga agian sa carousel route diin ipaguyod ang mga illegal parkings, mga estraktura nga makabalda sa agianan ug uban pa. Giawhag usab ang mga motorista sa pagsunod gyud sa mga gipatumang mga signages sa kadalanan ug pagpangutana sa ipakatap nga kapin 200 ka mga traffic enforcers inabagan sa mga traffic aide ug mga barangay tanod sa mga lugar nga maagian sa carousel route ug sa solemn procession karong hapon.

Ang mga trucks, vans, trailers ug lain pang motor vehicles gikan sa North Reclamation Area paingon sa habagatan moagi sa S. Osmeña Blvd., moagi sab sa tunnel hangtod na sa SRP, ug sa padulngan.

Tanang sakyanan gikan sa Tabunok, Talisay, Minglanilla, Naga, San Fernando ug Carcar paingon sa North Reclamation Area moagi sa SRP Coastal Road, moagi sab sa tunnel, ug moadto na sa padulngan.

Ang mga Public Utility Vehicles sama sa Buses/Mini-buses, ug GT Express gikan sa habagatan moagi sa N. Bacalso Ave., moliko sa tuo sa Mambaling Trunk Road paingon na sa SRP, sa Temporary Terminal duol sa St. Pedro Calungsod Templete. Gikan sa SRP Terminal, moagi sa South Coastal Road, hangtod na sa Talisay, ug sa padulngan.

Ang mga gikan sa amihanan paingon sa Capitol/Uptown nga moagi sa M.J. Cuenco Ave, moliko sa tuo sa Juan Luna Ave., moliko sa Gorordo Ave., moliko sa M. Gaisano St. kon N. Escario St., hangtod na sa padulngan. (/EIM)(BANAT NEWS)