Nakuryentihan usa patay, usa angol

CEBU, Philippines - Namatay ang usa  sa duha  ka mga  tinun-an  kinsa nakuryentihan sa grounded nga poste sa Visayan Electric Company (VECO) sa gawas sa compound sa tulunghaan sa Sacsac Elementary School sa barangay Sacsac, lungsod sa Consolacion alas 12:00  pasado ang takna sa udto   sa  miaging adlaw.    

Si PO1 Albert Jiminez miila sa  namatay  nga  mao   si Hervy  Tarima, 7, samtang  si  Wilfred Bordario, 9 ,  nga  iyang  kauban   nga    nagtungha sa Grade II,  sa Sacsac Elementary School, naangol  ug  tua  pa  sa hospital.           

Matud pa ni PO1 Jiminez  nga  ilang nasuta nga nanggawas  na ang  mga  biktima sa compound sa ilang  tulunghaan   aron  mamauli  ug  maniudto.           

Apan  ilang  gituohan nga  nahikapan niini ang  maong  poste  sa daplin sa dalan  ug  diha-diha  nakuryentihan   sila.

Si Tarima  maoy  nagrabihan  ug namatay, samtang  si Bordario nga  wala  kaayo  ma-grabihi  nalibre  pa  sa  mga  doktor.       Ang pipila ka molupyo sa maong lugar nga nakakita maoy   mitabang sa mga biktima ug gidala   ngadto  sa Eversely Child Sanitarium apan gideklarar  sa mga doktor nga dead on arrival  si Tarima.           

Nasuta  sa  kapolisan  nga  nasunog   ang  kalawasan   ni  Tarima,  agi  sa kuryenti,  samtang  si Bordario,  may mga  paso  man sa lawas  apan  dili kaayo  grabe.           

Si PO1 Jiminez miingon nga gitawagan na nila ang tagdumala sa VECO   aron  sa  pagsusi  sa   maong poste. Matud  pa ni  PO1  Jiminez   nga gawas  kun  ayuhon  dayon  ang  maong  grounding, gituohan  nila nga   daghan  pang  mga bata   ang  makuryentihan. (BANAT NEWS)