Suspek pagpusil patay sa konsehal sa Sibonga gi-ambush
CEBU, Philippines - Naangol ang gitudlong suspetsado sa pagpusil patay ni Sibonga councilor Gomersindo Sabanal diha sa barangay Manatad sa lungsod sa Sibonga human kini gi-ambush sa barangay Apo sa lungsod sa Argao pasado alas 5:00 sa miaging hapon.
Ang naangol naila nga si Godofredo Mansanades, molupyo sa barangay Apo sa lungsod sa Argao.
Naangol sa iyang tuong bukton ug sa iyang tiyan ang biktima nga daling gidala sa Barili District Hospital ug gibalhin sa Vicente Sotto Memorial Medical Center.
Matud pa ni Insp. Alejandro Batobalonos, ang hepe sa Argao nga ang biktima naglakaw samtang ang suspetsado naghuwat kaniya sa usa ka awaaw nga dapit ug mipusil kaniya sa makaduha ka higayon.
Ang barangay Apo kasikbit lang sa Cantolaroy nga sakop na sa lungsod sa Sibonga. Ang maong biktima sumala pa sa kapolisan nalambigit sa pipila ka insidente sa pagpamusil sa Argao ug Sibonga human kini gireklamo sa mga molupyo.
“Kasagaran sa complaints kay indiscriminate firing involving him pero di namo maabtan sa area,†matud pa ni Batobalonos.
Gani gipasakaan na og kasong murder ni Chief Insp. Bonifacio Tecson, hepe sa Sibonga, si Mansanades ug ang iyang mga kauban human positibo silang nailhan sa mga saksi nga maoy mipusil kang Sabanal sayo ning tuiga.
Ang kapolisan naghulat pa sa warrant of arrest ni Mansanades aron ila kining masikop samtang ila sang gipangita kung kinsa ang nagpusil kaniya. (BANAT NEWS)
- Latest
