Usa patay, pito ang angol sa managlahing aksidente

CEBU, Philippines - Usa ang patay ug pito ang angol sa sunod-sunod nga  disgrasya sa kadalanan sa lalawigan sa Sugbo sa miaging adlaw.   Patay na dihang naabot sa tambalanan si Ellena Fano Villafuerte, 60, samtang angol si Jefferson Baclaan human nadumbolan ang motor nga ilang gisakyan sa usa ka Nissan Safari sa barangay Taloot sa lungsod sa Argao pasado alas 8:00 sa miaging gabii.

Base sa imbestigasyon sa kapolisan nga ang mga biktima sakay sa motor gikan sa dakbayan sa Carcar ug padulong unta kini sa lungsod sa Argao samtang ang Nissan Safari gikan sa lungsod sa Argao.

Dihang naabot sila sa barangay Taloot kalit nga mipaliko sa iyang Nissan Safari si Ricardo Narca Cambarijan, 36, hinungdan nga nadumbolan niya ang motor nga gisakyan sa duha. Nalabay sa karsada ang duha ug daling gidala sa tambalanan apan patay na si Villafuerte ug naangol si Baclaan.

Samtang, angol ang duha ka drayber sa motor human nagbinanggaay  kini sa barangay  Poblacion sa lungsod sa Liloan pasado alas-3 sa miaging hapon.

Ang naangol naila nga sila si Mario Villaveles Tibon ug si Jennel Para Monta nga daling gidala sa Vicente Sotto Memorial Medical Center aron matambalan. Angol sab sila si Faustino Bacalla Delica, 71, ang drayber sa Tamaraw FX nga nakasaghid sa motor nga gimaneho ni Wilfredo Lozarito Payda, 50, sa barangay Mangga sa lungsod sa Tuburan pasado alas-5 sa miaging hapon.

Matud pa nga gisuway og kabig ni Delica ang manobela sa iyang gimaneho sa tuo apan nasaghiran niya ang motor ni Payda ug nabangga pa gyud kini sa mahogany.

Samtang angol sab si Rennel Metoda Tan human madumbolan sa SUV nga gimaneho ni Normel Lapinid Fernandez ang iyang gimaneho nga motor sa barangay Dakit sa lungsod sa Barili sa alas 6:00 sa miaging gabii.  Sa samang adlaw usab nahagbong sa pangpang ang usa ka trak de karga nga miresulta sa kamatayon sa tulo ug 37 ang nangaangol sa Tabogon. (BANAT NEWS)