Background check sa aplikante sapagka-polis nakaingon pagkasikop

CEBU, Philippines - Nasikop sa kapolisan ang usa ka nahagbong nga aplikante sa pagkapolis sa buybust operation sa sitio Mahayahay 2, barangay Pasil sa dakbayan sa Sugbo pasado alas 9:00 sa miaging gabii.  Ang nasikop naila nga si Dennis Evalle, 28, may live-in partner, molupyo sa samang lugar. Sumala pa sa hepe sa City Intelligence Branch sa Cebu City Police Office, Chief Insp. Romeo Santander nga nakadawat og impormasyon ang iyang buhatan kalabot sa kalihokan ni Evalle.

Matud pa ni Santander nga ang maong kasayoran gikan mismo sa Regional Intelligence Division sa Police Regional Office 7.

Midugang si Santander nga ang maong lalaki mi-apply pagka polis karon lang tuiga apan nahagbong tungod kay nasuta sa background check nga dunay kalambigitan si Evalle sa illegal nga kalihokan.

Busa padayon nga gipanid-an sa kapolisan ang kalihokan ni Evalle hangtod nga nasuta nga positibo ang ilang pagdududa.

Nagpahigayon dayon og buy bust operation ang sakop sa CIB ug sa City Anti Illegal Drugs Special Operations Group (CAIDSOTG).

Narekober gikan sa suspetsado ang napulo ka gamay nga pakete sa shabu, usa ka putos sa plastic, buy bust money nga duha ka P200, ug ang gituohang halin sa suspetsado nga P300.

Nakuha sab sa kapolisan ang duha ka moli-moli ug duha ka video karera machine sa balay sa biktima.

Mipahimangno si Santander sa mga nangambisyong mamahimong polis nga dili moapil sa mga ilegal nga mga kalihokan tungod kay estrikto na karon ang kapolisan sa pagsusi sa background sa mga aplikante.

Ang suspetsado nga si Evalle kasamtangan karon nga natanggong sa Cebu City Police Office. (BANAT NEWS)