Simbang Gabi sa Lapu-lapu malinawon

CEBU, Philippines - Malinawon ang unang adlaw  sa "Simbang Gabi" sa unom ka dagkong simbahan sa dakbayan sa Lapu-Lapu kagahapon sa kaadlawon.

Matud pa ni Lapu-Lapu City Police Office Director P/SSupt. Rey Lyndon Lawas  nga  kining  tanan  naggumikan  sa gipatukod  niya nga  mga  police center sa tanang  simbahan  sa maong  dakbayan.

Gawas  sa  police  center,  gikatagkatag  pa  niya  ang  mga  kapolisan   sa  mga  lugar  nga  sagad  mahitaboan  sa krimin.

Midugang si  PSSupt.  Lawas  nga  nakahatag  usab  og  dakong   ayuda  sa kahapsay  sa ‘simbang gabi’  ang  mga force  multiplier  nga  naglakip  sa mga  tanod  sa barangay.

Gipasalig  usab  ni  PSSupt. Lawas  nga magpadayon ang  presensiya sa kapolisan uban  sa  mga barangay tanod sa mga simbahan hangtod sa paghuman sa Pasko ug Bag-ong Tuig.

Nagpasalamat   si SSupt. Lawas sa mga opisyal  sa barangay nga miabag sa kapolisan sa pagmentinar sa kalinaw atol sa simbang gabi sa ilang lugar.

Samtang adunay tulo ka pahimangno si SSupt. Lawas ngadto sa mga residente sa Lapu-Lapu,  nga  bilinan  gyud  og  tawo  ang  ilang  balay  aron  way  kawatan  nga  makasulod.

Likayan  ang  pagsul-ob  og  mahalong  alahas  aron  di birahon  ug  kawaton  sa  mga kiriwan  kun  mosimba, dili mosuot sa mga bagang duot sa katawhan ilabi na kung adunay dalang bata.

Ang Lapu-Lapu adunay 6 ka mga dagkong simbahan nga nagpalibot sa isla sa Mactan  nga misugwak ang kadaghang  tawo nga mitambong sa unang adlaw sa Misa de Gallo kagahapon sa kaadlawon.

Pito na lang  ka simbang  gabi  ang  sagubangon  sa katawhan  tungod  kay  nakunsomo  na  niini  ang  duha. (BANAT NEWS)