Trabahante sa pier gipusil angol sa sikyu

CEBU, Philippines - Kritikal ang kahimtang sa usa ka lalaki nga gipusil sa usa ka security guard duol sa guard house sa Gothong Southern sa may Pier 4, T. Padilla Extension, Arellano Boulevard, barangay Tejero sa dakbayan sa Sugbo sa alas 9:45 sa miaging gabii.

Ang biktima naila nga si Antonio Alega, 36, minyo, head sa Container Repair, molupyo sa sitio Pandayan, barangay Mambaling sa dakbayan sa Sugbo.

Ang suspetsado naila usab nga si Ernesto Mendoza, hingkod, security guard sa Total Shield Security Specialist Services, lumad nga molupyo sa dakbayan sa Bacolod.

Si SPO1 Ruth Violango nga nahinabi sa Banat News miingon nga ang biktima ug ang suspetsado naglalis sa wala pa mahitabo ang maong krimin kay ang mga trak nga nakasulod sa Gothong Southern, pagawason unta sa gwardiya kay walay papeles. Ang maong lalis nasaksihan usab sa head guard nga  si Rico Hatamosa kinsa  didto mismo  sa  maong higayon. Dihang  miinit  na  ang  lalis, gipusil  sa suspek  ang  biktima apan  wala  makabuto  ang  iyang  armas .

Apan  gisundan  kini  og  kablit  ug dihang  nakabuto  natumba  ang  biktima  ug  gigakos   ni Hatamosa  ang  suspek. Apan gitionan hinuon niini si Hatamosa sa armas ug maayo na lang  kay wala usab    makabuto.

Midagan si Hatamosa sumala pa ni Violango ug nakadungog kini og upat ka buto sa armas. Matud ni Violango nga human tiwasi sa suspetsado ang biktima midagan kini sa wala pa matino nga lugar ug daling mibalik si Hatamosa aron susihon ang biktima. Naabtan ni Hatamosa ang biktima nga nagkadugo ug dali kini niyang gihatod sa Chong Hua Hospital.

Napunitan  sa  kapolisan  gikan sa crime scene ang tulo ka kabhang ug duha ka bala sa 9mm nga pistola ug ang usa ka slug.     

Si Violango miingon nga narekober sa kapolisan sa Consolacion ang armas nga gituohang gigamit sa suspek tungod kay misulti sa kapolisan ang gibilinan sa maong armas.   (BANAT NEWS)