Nagsunog sa kaugalingon patay

CEBU, Philippines - Patay ang usa ka lalaki nga may diperensya sa pangisip human  magsunog  sa kaugalingon pinaagi  sa gasolina nga  iyang  gikaligo  ug  gidagkotan didto sa barangay Centro Bunakan sa lungsod sa Madridejos , alas 4:00 sa miaging hapon.

Ang nagpakamatay naila nga si Wendell Villamor, 23, molupyo sa Bunakan sa maong lungsod.

Matud pa ni Insp. Roberto Hugo ang hepe sa Madridejos Police Station nga ang biktima nakit-an pa nga nagkaon atubangan sa balay sa iyang uyoan nga si Roque Baruc,  diin  siya  magpuyo sa wala pay alas 4:00 sa hapon .

Sumala pa ni Insp. Hugo nga si Villamor  human  og  kaon, nakit-an usab  kini  sa  iyang  ig-agaw  nga si Kimberly Ragas nga nagdala og usa ka gallon nga gasolina ngadto  sa balay nila.

Unya miadto kini  sa  likod nga bahin sa balay ug pipila ka minuto nakatimaho na  ang mga silingan niini og lain nga baho. Dihang  gisuta sa mga silingan  ilang nakita   nga   napaig na kini.

Nagduda ang kapolisan nga kini naghikog  pinaagi sa pagdaob  sa iyang kaugalingon gamit ang gasoline.

Matud pa Baruc,  ang  uyoan sa biktima nga  daan  na  nga may diperensya sa pangisip si Villamor  nga gihambin niini sulod na sa duha ka tuig.

Si Insp. Hugo miingon nga dihang mirespondi ang iyang sakop  didto  sa lugar  nga  gihikogan  ni Villamor nasuta nga napaig ang atubangang bahin sa lawas niini.

Matud pa ni Insp. Hugo nga gigakos pa sa biktima ang gallon sa gasoline nga gikaligo niini. Nagduda ang pamilya niini, matud pa ni Insp. Hugo nga pirme kining napasmo  sa kaon  ug nagtuo usab sila nga gipadautan ang biktima tungod kay lahi na man gyud kini og lihok dihang nauli kini gikan sa Ilo-ilo. (BANAT NEWS)