Tungod sa linog, Talisay City Hall manaktak

CEBU, Philippines - Human sa nahitabong linog nga giingong maoy hinungdan sa pagkunhod sa pundo sa kagamhanan sa dakbayan sa Talisay,  ang administrasyon mihukom sa paglaslas sa gidaghanon sa mga job order (JO) gikan sa 2,000 ngadto sa 1,400 na lang.

Ang maong pagpanglaslas sa JO ipahigayon karong sunod buwan niining tuiga. “Tungod sa nahitabong calamity kinahanglan gyud mag-reduce na ta sa atong spending,”  matud ni Talisay City Administrator John Yre De los Reyes.

Si Yre mibutyag nga sugod karong Nobiyembre 1,400 ka mga JO na lang ang ipabilin nga apod-aporon sa tanang mga departamento diha sa city hall.

Matud ni Yre nga sa maong paagi matag buwan ang siyudad maka-save kini og P3.6 milyones. Niining ulahi lang mikabat ngadto sa 2,000 ang gidaghanon sa mga JO sa siyudad diin matag usa kanila ang magdawat og P6,000 nga sweldo matag buwan.

Ang siyudad mogahin og P12 milyones matag buwan alang sa sweldo sa mga JO.

Sa iyang bahin, si Talisay City Budget Officer Edgardo Mabunay nagkanayon kini nga ang siyudad duna kini P457nga budget matag tuig ug makasustiner kini sa pagsweldo sa 2,000 ka mga JO apan bisan pa niini kinahanglan gihapong tibhangan ang gidaghanon sa mga JO.

“Makasweldo ta sa 2,000 job orders kay naa man tay buffer sources from unused funds like the salaries of the vacant positions. Pero mas maayo gyud unta nga pagamyan ni para dili kaayo ma-exhaust atong funds intended for the salaries and wages of employees”, pasabot ni Mabunay.

Si John Yre nagkanayon nga sa pag-implementar sa maong plano ilahang laslasan ang quota sa mga JO sa matag konsehal sa siyudad.

Wala hinuoy gibutyag nga kantidad kung pila gyu’y naangkon damage sa mga imprastraktura sa siyudad human sa maong linog.

Ang matag konsehal duna kini 50 ka quota matag usa ug himuon na lang  unya kining 30.

Matud usab ni John Yre nga tanang konsehal lakip na ang ubos sa administrasyon patas ang mga quota niini sa JO. Dugang niya nga ang bise mayor iparehas usab ang gidaghanon sa quota niini sa mayor o ba kaha ubos pa.

Ang quota sa mayor giingong mikabat kini ngadto sa 300 apan giingong labaw pa ang gidaghanon sa quota sa bise mayor.

Ang dakbayan sa Talisay nagkataas ang gidaghanon niini karon sa mga JO diin niadtong si kanhi Kongresista Eduardo Gullas pa ang mayor sa siyudad duna lang kini 200 ka JO ang maong mga JO dihang si kanhi Mayor Socrates Fernandez na ang milingkod nga mayor sa Talisay mikabat sa sobra sa 1,000 ang gidaghanon sa JO ug karon kang Mayor Johnny De los Reyes miabot na ngadto sa 2,000 ang gidaghanon. (BANAT NEWS)