Dugang kabus nga kabataan tabangan sa Alay Lakad sa Mandaue
CEBU, Philippines - Dugang mga kabus nga kabataan ang makapahimulos sa scholarship program nga gipasiugdahan sa Junior Chamber International (JCI-Mandaue) ug Alay Lakad Foundation, Inc.- Mandaue ug sa kagamhanan sa dakbayan sa Mandaue sa umaabot pa nga tuig.
Kini nunot sa nahimo na nga tinuig nga kalihokan nga Alay Lakad nga gipahigayon niadtong miaging Domingo nga giingong labing malampuson .
Gisalmotan sa kapin sa 5,000 ka mga tawo ang maong lakaw sa tuyo nga makatigom og pundong salapi nga magamit sa nagpadayon nga programa nga ilang gipasiugdahan.
Si Bise Mayor Glenn Bercede maoy nangulo sa mga opisyal ug kawani sa kagamhanan nga misalmot sa maong kalihokan.
Samtang ang academe gipangulohan usab ni Mandaue City School Division Superintendent Virginia Zapanta.
Ang mga JCI-Mandaue gipangunahan ni Rodencio Vergara 1V ug ang Alay Lakad Foundation Inc., gipangulohan sa ilang presidente nga si Godofredo Castanares.
Si Castanares sa iyang pamahayag ngadto sa mga tigbalita miingon nga sa kasamtangan napahimuslan ang scholarship program sa 57 ka mga kabus nga kabataan.
Matud pa niya nga nagtungha sa kolehiyo ang 24 ka mga tinun-an ug adunay elementary, high school, technical schools, ug Alternative Learning System. Apan ang labing daghan kanila mao ang ilang gipatungha nga mga street children.
Gisugdan ang maong kalihokan sa usa ka misa sa National Shrine of Saint Joseph ug gisunod gilayon ang ilang pagpanglakaw subay sa dalan S.B. Cabahug, A.C. Cortes Avenue ug ilang gitapos didto sa Mandaue City Cultural and Sports Complex sa sitio Tribunal sa barangay Centro sa maong dakbayan.
Si Maricel Yu nga maoy focal person sa Mandaue City Council for the Protection of Children miingon nga ang kagamhanan sa dakbayan sa Mandaue adunay gigahin nga P500,000 isip cash donation alang sa maong programa.
Nadugangan usab kini tungod kay matag misalmot sa maong lakaw nanghatag usab og cash nga donasyon. (/WC) (BANAT NEWS)
- Latest
