Police gipatay, asawa ug sibilyan angol
DUMAGUETE CITY, Philippines – Patay ang usa ka polis samtang naangol ang iyang asawa ug usa ka sibilyan ang napagan human sa nahitabong pagpamusil niadtong Martes sa hapon diha sa barangay sa Taclobo Dumaguete City.
Ang nakalas mao si Police Officer 1 Jay Carpintero, 33, residente sa Barangay Cadawinonan, Dumaguete City ug nadestino sa Quick Response Team sa Dumaguete Police.
Ang iyang asawa nga si Rodelita kasamtangang nagpaalim sa usa ka tambalanan sa siyudad ug gibantayan karon sa kapolisan.
Si Supt. James Goforth, Dumaguete police chief nagkanayon nga nakabaton og upat ka samad pinusilan si Carpintero kinsa padung na pauli luwan sa motorsiklo ug angkas ang iyang asawa dihang sila gipamusil samtang nagpatobil sa usa ka gasolinahan sa Larena Drive sa Barangay Taclobo.
Matud pa nga bisan naigo na kaduha, nakahimo pa pagpadagan si Carpintero sa motorsiklo apan gigukod siya sa gunman nga padayong namusil kanila hangtud nga silang duha nahagba.
Sumala pa nga diha na gitiwasan si Carpintero ug gikuha ang iyang service firearm nga M-4 Baby Armalite Rifle, wala makuha sa gunman ang iyang personal nga kalibre 45 pistola nga gitakin sa iyang hawak nga wala makita sa gunman kay nagkaob ang biktima.
Dugang pa ni Goforth nangilog ang gunman og motorsiklo nga gipanag-iya sa usa ka Herth Josephus Cabanag. Dihang mipalag si Cabanag gipusil kini sa dughan. Tungod niini mipasirit sa iyang motor si Cabanag padung sa tambalanan, apan ang suspek nakakuha og laing motorsiklo nga gipanag-iya sa usa ka Margarette C. Hermogino nga taga Motong, Dumaguete City.
Giabandonar ang motor pipila ka oras diha sa barangay Balili sa lungsod sa Valencia. Dako ang pagtuo ni Goforth nga may kalambigitan sa trabaho ang pagpatay kang Carpintero ug planado kaayo ang paghimo niini. (BANAT NEWS)
- Latest
