Mamalitay’g scrap gipusil patay

CEBU, Philippines - Patay na nga nahidangat sa tambalanan ang  usa ka mamalitay og scrap materials human kini pusila sa  wala hiilhing kriminal  didto  sa Juan Luna extension, barangay Poblacion dakbayan sa Danao alas 12:00  pasado  sa hapon  sa  miaging  Domingo.

Ang biktima nailhan  nga  si Romulo Roble, 44, molupyo sa Lower Binaliw, sa maong dakbayan ug  giingong mamalitay   og scrap. Base sa pasiunang imbestigasyon sa kapolisan sa dakbayan sa Danao nasayran nga ang biktima aduna untay paliton sa usa ka tindahan sa nahisgutang dapit.

Sa diha nga miduol  kini   sa  tindera  kalit  lang  mihunong    sa kilid  niini ang  usa  ka   motorsiklo  nga DT nga giingong gisakyan  sa  usa  ka wala hiilhing  lalaki.

Diha-diha  gipusil  sa makadaghang  higayon  ang  biktima   busa  samdan  kini  sa  nawong,  dughan  ug  bukton.

Dali   nga gidala  ngadto   sa Cebu Provincial Hospital sa maong dakbayan ang biktima apan gideklarar kini nga dead on arrival.

Napunitan  sa kapolisan  didto  sa   crime scene ang upat ka kabhang sa kalibre .45 ug usa ka slug sa susamang armas nga gituohang mao usab ang gigamit sa pagpusil.

Ang kapolisan misubay pa  sa mga posibling hinungdan sa pagpamusil  aron  matino  kun wala bay kontra ang biktima   o  kaha  aduna bay   gikalalis sa wala pa mahitabo ang insedenti.

Padayon   usab  nga  gipanid-an  sa kapolisan  ang  kriminal  aron  sa pagsikop niini. (Lesley Caminade-Vestil ug Marvi Sardalla USJR Masscom Intern/WC)