Nangihi gipusil patay sa wa ilhing kriminal

CEBU, Philippines - Usa ka lalaki ang gipusil patay sa wala pa mailhing kriminal  didto sa sitio Kamanggahan sa barangay Mantalongon, lungsod sa Barili kagahapon sa ala 1:00 sa kaadlawon. Ang biktima naila nga si Arnel Montelora, 28, may kapuyo, ug lumolupyo sa  barangay Mantalongon sa  Barili.

Si PO2 Richard Cababat, desk officer sa Barili Police Station nagkanayon  nga sa alas 2:00 sa kaadlawon mitawag ang uyoan sa biktima nga si Cipriano Montelora ug mitaho nga gipusil ang iyang pag-umangkon.

Miresponde ang mga elemento sa kapolisan sa maong lungsod nga gipangulohan ni SPO2 Marcelo Quevedo Jr .

Base sa pasiuna nga imbistigasyon nasuta nga nianang  ala 1:00  sa kaadlawon nakadungog ang igsoon sa biktimaog mga  buto  sa armas de fuego.

Si Jonalyn Montelora Esconde mitug-an sa kapolisan nga dali siyang miadto sa balay sa iyang igsoon ug mao na lay iyang nakit-an nga naghayangug wala nay kinabuhi si Arnel .

Matud ni PO2 Cababat nga nangihi unta ang biktima gawas sa ilang balay apan gipusil kini  sa wala pa mailhing tawo. Nakaangkon og pito ka samad pinusilan sa nagkalain-lain nga bahin sa iyang lawas hinungdan sa  hinanali nga kamatayon  ni  Montelora.

Padayon pa ang imbistigasyon sa mga kapolisan sa pag-ila sa motibo sa maong pagpamusil. (BANAT NEWS)