Talisay SK president supak SK tangtangon

CEBU, Philippines -  Ang presidente sa Sangguniang Kabataan Federation (SKF)sa dakbayan sa Talisay dili uyon nga tangtangon ang SK.

Si Carmel John Burlas nga nahinabi sa Banat News kagahapon nagkanayon  nga ang SK maoy tingog sa kabataan aron mapadayag ang ilang mga sentimento.

Matud usab ni Burlas nga kung tangtangon ang SK anugon ang ilang mga proyekto alang sa komunidad ilabi na sa kabataan.

Gipasabot ni Burlas nga ang SK maoy kasagarang duolon sa kabataan kung bahin sa sports tungod kay kasagaran sa mga bata mataha nga moduol ngadto sa mga opisyal sa barangay ug  sa siyudad.

“Kung i-abolish nila ang SK ang mga batan-on walay kaduolan, ang SK maoy sayon kaayong duolon sa mga batan-on ilabi na kung mangayo kini og mga bola sa basketball kung dunay mga liga”, ni Burlas pa.

Gawas sa mga sports equipment matud ni Burlas nga usa sa iyang proyekto mao ang pagpanghatag og mga school supplies ngadto sa kabataan nga nagtungha sa elementarya.

Gawas  niini  nanghatag usab  siya og drinking fountain aron masiguro nga  dili  makainom   og kontaminado   nga tubig ang  mga  bata  sa  ilang   tulunghaan.

Matud ni Burlas nga sa pagkakaron ang iyang gipataoran  og drinking fountain  mao ang tunghaan sa ilang barangay sa Lagtang.

Nidugang siya  nga kun magpadayon ang SK taoran  niya  og  drinking  fountain  ang tanang  tulunghaan sa ubang  barangay  sa Talisay.

Nasayran  nga 185 ka mga kongresista ang mipaluyo sa House Bill 2349 sa pag-uswag sa SK election gikan sa Oktubre 2013 ngadto sa Oktubre 2016. (BANAT NEWS)