CTU magtukod og eskuylahan sa Naga City

CEBU, Philippines - Mga estudyanteng Naganhon nga motungha sa kolehiyo dili na unya mobiyahe og layo paingon sa Sugbo tungod kay ang Cebu Technological University (CTU) magtukod na unya og extension campus diha sa siyudad. Sa pagsaulog sa ika-6th Charter Day sa siyudad ug ika-53 nga birthday kagahapon ni Mayor Valdemar Chiong ang siyudad  ug  CTU nga gipresentahan sa ilang presidente nga si Dr. Bonifacio Villanueva, Kongresista Gerald Anthony “Samsam” Gullas Jr. sa unang distrito  ug Senin Paulin, Division Superintendent sa Naga nagpirmahay kagahapon sa Memorandum of Agreement (MOA) sa katukoran sa CTU extension diha sa siyudad.

Ang daang merkado publiko sa Naga nga nahimutang diha sa Central Poblacion maoy himuong CTU campus extension tungod kay ang merkado publiko balhinon man diha dapit sa reclamation sa Naga. Ang bag-ong building sa merkado nga gi-construct na gikatakdang mahuman sa buwan sa Nobiyembre niining tuiga. Si Gullas kansang katiguwangan nabantog nga mga educators ug apo sa tuhod sa founder sa University of the Visayas (UV) nga gidumala karon sa  iyang apohan nga si kanhi Kongresista Eduardo Gullas, miingon nga importante ang edukasyon sa tanan.

Gipahigayon usab kagahapon ang groundbreaking  alang sa tukorong  120 ka mga balay diha sa sitio Sindolan sa barangay Tinaan nga gipasiugdahan sa Gawad Kalinga (GK), Cemex ug LBC.

Matud ni Chiong nga ang Cemex maoy midonar sa luna ngadto sa Naga, samtang ang GK maoy community coordinator kinsa maoy mopahigayon og mga seminar ngadto sa komunidad, ang LBC  maoy mopatukod sa mga balay ug ang siyudad sa Naga maoy moandam sa luna ug uban pang mga panginahanglanon sa pag-implementar sa proyekto. Gawas niini kagahapon sa buntag ang siyudad nag-apod-apod usab og hinabang sama sa bugas ngadto sa 650 ka mga mananagat kinsa nangabiktima sa oil spill. (BANAT NEWS)