Konduktor gipatay sa “Namokong”

CEBU, Philippines - Patay ang konduktor sa jeepney nga nagbiyahe sa Ibabao Estancia ug Manalili  sa dakbayan sa Sugbo human gidunggab sa  ilang pasahero nga nasuko nga gipaninglan og plete sa pagkanaug niini sa karaang merkado publiko sa barangay Centro sa dakbayan sa Mandaue alas-9 pasado ang takna sa miaging gabii.

Ang biktima mao si Edmund Ensular Bayarcal, 30, lumad nga taga barangay Malolos, lungsod sa Barili ug temporaryong nagpuyo sa purok Tambis sa barangay Ibabao,  dakbayan sa Mandaue.

Ang suspetsado mao si  Bobby Duwal Luna, 44, taga barangay Opao sa maong dakbayan kinsa nadakpan sa hot pursuit operation sa kapolisan.

Si PO2 Jesson Estrera sa kapolisan sa Presinto 1 sa Mandaue City Police Office (MCPO) miingon nga gikan sa Cebu City ang suspek ug gipaninglan sa biktima dihang nanaog kini apan miinsister kining naka-plete na siya.

Nanaog ang suspetsado nga nagyawyaw sa pag-ingon nga “gusto diay mo og patay,”  dungan sa pag-ibot og kutsilyo. Ang biktima pagkakita sa kutsilyo mikaratel og dagan ug mipunit og bato nga iyang gihapak sa ulo sa suspek.

Ang suspetsado misamot sa iyang kasuko ug wala lung- i og gukod ang biktima hangtud nga naapsan ug gidunggab kini sa dughan.

Human sa maong pagdunggab yano nga milakaw ang suspetsado subay sa dalan A. del Rosario apan naapsan sa mga sakop sa Special Weapon and Tactic (SWAT) pinangulohan  nila ni PO2 Carlos Perales, PO1 Binjie Trangia ug midakop kaniya. (BANAT NEWS)