Highway sa kabukiran
CEBU, Philippines - Usa ka kompaniya nga gipanag-iya sa gobyerno sa nasud sa South Korea ang interesadong mougmad sa Trans-axial Highway isip Tool Highway sa lalawigan sa Sugbo nga walay gasto ang lokal nga kagamhanan.
Gidapit ni Kong. Benhur Salimbangon ang pipila ka opisyal sa maong kompaniya sa pagbisita sa Sugbo aron pagpakigtagbo nilang Gob. Hilario Davide III ug mga sakop sa Hunta Probinsiyal.
Matud pa ni Salimbangon nga una na siyang gidapit sa mga Koryano sa pagbisita sa dapit diin nahimutang ang susamang proyekto nga ilang mugnaon sa Sugbo.
Nakadayeg si Salimbangon sa maong proyekto diin ang gibasehan mao ang kapaspas sa pagbiyahe dili ang unsa kabaga sa semento sa karsada.
Gani ang 150 ka kilometros nga ilang gibiyahe nakuha lang og usa ka oras diin ang mga bungtod gihimoan og tunnel samtang taytayan ang adunay mga lawom nga bahin aron dili maglikoliko ang karsada.
“If this will happen to us sa Cebu, maoy daku kaayong development nga mahitabo,†matud pang Salimbangon.
Nangayo si Salimbangon sa suporta sa kagamhanan sa lalawigan sa Sugbo diin ang anak ni anhing bise-gobernador Gregorio Sanchez nga maoy nagduso sa trans-axial highway, Engr. Grecilda Sanchez, naglingkod karon isip sakop sa hunta probinsiyal.
Si Davide sa iyang bahin nangayo og pormal nga komunikasyon sa mga Koreyano aron iyang maaksiyonan ang ilang plano.
Si Salimbangon gikatakda nga moduso og balaudnon sa Kongreso sa pagpatuman sa proyekto.
Sayo niini gibana-banang mogasto og P50 bilyones aron maugmad ang trans-axial highway. (BANAT NEWS)
- Latest
