Konsehal namusil og unggoy gidakop

CEBU, Philippines - Konsehal sa usa ka lungsod sa habagatang Sugbu ang gisikop sa kapulisan kaganihang buntag human kini pasanginling namusil og unggoy sa lasang sa Sitio Mainit, Barangay Montaneza, Malabuyoc kaganihang buntag.

Ang gisikop nga konsehal mao si Ronda Councilor  Alfredo Villafuerte, 68, nga taga Barangay Canduling ug ang kauban niini nga si Lucino Carreon, 50, nga taga Barangay Palanas.

Usa ka lisensyadong M-4 Armalite rifle nga adunay 36 ka mga bala ang nakuha kang Villafuerte samtang usa ka 22 Armscor Magnum rifle nga adunay lima ka bala ang nakuha usab gikan kang Carreon.

Si PO3 Protacio Tago Jr., imbestigador, mibutyag nga una nilang nadawat ang impormasyon nga adunay namusil sa maong lugar hinungdan nga miresponde gilayon sila.

“Pag-abot sa kapulisan wala na naabtan duna lay sako nga naay sulod dako-dako nga unggoy,” matud ni Tago.

Siya midugang nga ang pagpamusil ingong lingaw-lingaw lang sa duha ka mga dinakpan.

Ang duha mag-atubang karon og kasong kalapasan sa RA 9147 o Wildlife Resources Conservation and Protection Act.

Nakig-alayon na usab karon ang kapulisan sa Department of Environment and Natural Resources alang sa paghipos sa maong mananap.

Samtang gimandoan ni Malabuyoc Mayor Lito Narciso Creus ang kapolisan nga pasakaan gyud og kaso ang namusil og unggoy sa protektadong lugar sa ilang lungsod.

Giubanan ni Creus ang kapolisan sa pagsusi sa dapit diin nasikop ang mga suspetsado nga namusil og unggoy sa barangay Montaneza, ang dapit sa Mainit Hotspring.

Ang dapit usa ka lasang nga adunay pito ka tubod ug bag-ohay lang gipalambo isip eco-tourism site sa pagpakigtambayayong sa Department of Tourism 7.

Matud pang Creus nga ang lugar pinuy-anan kanhi sa mga unggoy ug uban pang ihalas nga mga mananap apan anam-anam nga nawala tungod sa pagpamusil.

Buot si Creus nga mamalik ang maong nga mananap pinaagi sa pag-organisa sa mga tawo ug gitudloan sa DOT unsaon pagpanalipod ang mga mananap.  (BANAT NEWS)