Bus nalimbuwad, midwife patay

CEBU, Philippines - Patay ang 45-anyos nga ginang nga public midwife nga pasahero sa Ceres bus ug naangol ang drayber ug konduktor apil na ang walo nila ka mga pasahero  dihang nalimbuwad kini diha sa barangay Talaga sa lungsod sa Argao kagahapon sa alas 11:00 sa buntag.

Ang namatay mao ang nadat-ogan nga ginang nga si Ma. Teresa Ceballos, 45, taga barangay Panas, lungsod sa Dalaguete ug usa kini ka midwife sa Moalboal District Hospital.Samtang naangol ang drayber nga si Ernesto Yanong Zerna, 33, John Levi Cabanas, 23, ang konduktor;  Carlito Sereño, 53, Darlyn Heredia, 19, Consolacion Dalaguete; Fritz Abella, 22, Mambaling; Ian Nel Ladera, 21, Arnold Alcatin, 39, Alma Medalle, 46, Joseph Biraque, 27; ug Lea Mae Pangilinan, 21.Matud ni PO3 Benjamin Gerozaga sa Argao Police dihang nahinabi sa Banat News gikan sa lungsod sa Samboan ang bus paingon kini sa dakbayan sa Sugbo ug duna lay napu ka pasahero nga sakay apil na ang namatay nga ginang. Si Zerna usab sa iyang bahin, mipadayag nga igo lang siya mi-apply og break hinungdan nga nadisgrasya sila.

Samtang si Zerna dihang gikahinabi sa Banat News nangangkon nga una siyang mi-apply og brake dihang dunay traysikad nga mihunong sa iyang atubangan ug misuway siya apan adunay nagpadulong nga prime mover mitamak siya sa brake.

Apan gikatahong mitipas na hinoon sa kilid nga bahin sa dalan nga miresulta sa pagkatulimbang niini, gipasanginlan usab ni Zerna nga dangog ang karsada niadtong tungora.

Ang imbestigador sa maong aksidenti nga si PO3 Von Perido Tecson sa Argao Police Station nga gikahinabi sa Banat News miingon nga base sa nakuha nilang impormasyon nagkiglumba ang maong bus sa Sunrays Bus pipila ka gutlo sa wala pa ang aksidente diha sa kurbada.

“Naglumba-anay mani sila, mao to nga nadisgrasya unya kusog iyang (Ceres) dagan samotan pa nga danlog ang dalan,” padayag pa ni Tecson.

Ang mga biktima gidala sa Isidro Kintanar Memorial Hospital apan si Ceballos gideklarar nga patay na. Samtang ang mga pasahero nga grabe-grabe ang dali usab nga gi- transfer sa tambalanan dinhi sa dakbayan sa Sugbo.  Ang drayber nga nakaangkon og pangos nakagawas usab dayon ug mitahan sa kapulisan samtang gihikay na ang kasong ipasaka batok kaniya. (BANAT NEWS)