Manghimoay og mga paltik shotguns gironda

CEBU, Philippines - Manghimoay og mga paltik sa dakbayan sa Danao nga amahan ug anak, nasikop sa mga sakop sa Provincial Intelligence Branch atol sa gipahigayong buy-bust operation pasado alas-3 niadtong Lunes sa hapon diha sa sitio Cambiohan barangay Poblacion.

Ang nasikop mao silang Ananias Giangan, 72, anak niini nga si Rholan, 25, diin nakuhaan sila og mobalor kapin P700 mil nga kantidad sa mga gamit sa paghimo og mga armas.

Matud pa sa hepe sa kapolisan sa PIB, Supt. Rodolfo Albotra nga nakadawat sila og taho kalabot sa padayong pagpanghimo og mga paltik nga armas sa manag-amahan hinungdan nga ila kini nga gipaubos og surveillance hangtod nga ilaha kining nakompirmar.

Niadtong Lunes sa hapon, usa ka buy-bust operation ang gihimo sa mga sakop sa PIB nga gipanguluhan ni Sr. Insp. Leo Logroño sa maong dapit diin ilang gipalitan si Giangan og armas.

Dihang gitunol na ni Ananias ang shotgun dali nila kining giposasan kini samtang ang anak niini nga si Rholan naaktohan nga naghimo pa usab og armas.

Ang mga nasakmit sa kapolisan mao ang duha ka unit nga shotgun; tulo ka unit sa caliber .22; unassembled derringer revolver; one unit lathe machine with lathe check, tool post and tail; one unit bench drill; one unit compressor; one unit grinder motor; one unit engraver machine; Two units bench vice machine; pieces of shotgun barrels; pieces of pattern plates; one unit push drill machine; pieces of G.I.  pipes used for shotgun barrels; punch maker; metal pipes; adjustable wrench; drill bits ug Drill chuck.

Padayag pa ni Albotra nga manghimoay gyud ang duha og armas apan mas gihatagan nila og prayoridad ang paghimo og shotgun.

Ang duha ka dinakpan giingong nasayod nga illegal ang ilang pagpanghimo og armas apan napugos sila niini tungod kay wala sila’y laing panginabuhiang nakamahoan.

Matud pa nga P6 mil ngadto na sa P7 mil ang presyo sa shotgun gikan sa duha. Kasong kalapasan sa RA 8294 ang posibling ipasaka batok sa duha nga kasamtangang nabalhog sa Danao City Police Station. (BANAT NEWS)