MCCI mopasiugda’g mga kalihokan pahinungod sa Mandaue Charter Day
CEBU, Philippines - Magsugod na ugmang adlawa ang usa ka buwang selebrasyon sa Charter Day sa Mandaue City nga pasiugdahan sa mga sakop sa Mandaue Chamber of Commerce and Industry (MCCI) .
Kini pagabuksan pinaagi sa usa ka motorkada nga tapuson sa Mandaue Bridge Park sa barangay Umapad sa maong dakbayan.
Diha gihan-ay ang mga kalihokan nga molungtad og usa ka bulan nga gipahaum usab sa mga kalihokan sa pagsaulog sa Charter Day sa maong dakbayan nga gikatakda nga pagahimoon sa Agosto 30 niining tuiga.
Naglakip sa gihan-ay nga kalihokan mao ang MCCI Business Summit sa Agosto 16 nga gipaabot nga tambongan sa mga inilang magpapatigayon ug mga opisyal sa kagamhanan.
Lakip sa mga kalihokan mao ang tree planting activity nga Treebrew Life sa Agosto 17 nga pasiugdahan ni Mayor Jonas Cortes ug Bise Mayor Glenn Bercede uban sa San Miguel Brewery sa maong dakbayan.
Usa ka anti dengue day sa kabarangayan usab ang himuon nga pangulohan sa Rotary Club International District 3860 ug sa Cebu Coalition Against Dengue ug MCCI.
Moabag niini ang mga barangay opisyal nga gipangulohan ni City Association of Barangay Council Federation president Barangay Captain Ernie Manatad. Sa mosunod pa nga mga adlaw hangtod na sa adlaw sa kasaulogan sa Charter Day anniversary sa dakbayan adunay ipahigayong Men in Business, Investor forums, SSS pensioners, Business Seminar’s ug uban pang mga kalihokan. (BANAT NEWS)
- Latest