Magtiayon gi-ambush
CEBU, Philippines - Usa ka lalaki ang naangol human kini ug iyang asawa girakrakan sa duha ka lalaking angkas sa usa ka motorsiklo diha sa T. Padilla Extension, Barangay Tejero, dakbayan sa Sugbo kagahapon sa buntag.
Giila sa kapulisan ang biktima nga si Rodrigo Barquero, 54, usa ka liaison officer sa Kia Motors-Mandaue City branch, ug ang iyang asawa nga si Juliet Alma Barquero, 53, mga residente sa Barangay Nangka, lungsod sa Consolacion.
Sa imbestigasyon sa Homicide Section pinangulohan ni SPO4 Alex Dacua ang magtiayon sakay og usa ka dark grey Kia Rio dihang gitaparan sa itom nga Kawasaki nga motorsiklo ug ang backrider kalit nga mirakrak kanila ug mipasirit palayo.
Si Rodrigo, kinsa nagmaneho sa sakyanan, ang naigo sa iyang walang bukton ug ibabaw nga bahin sa walang dughan. Ang mga biktima mipara og taxicab ug nidiretso sa Perpetual Soccour Hospital. Narekober ang 16 ka kabhang sa bala nga .9mm nga gituohang gikan sa usa ka KG 9 submachine pistol.
Si Dacua mosusi kun may kalambigitan sa trabaho ang anggulo sa maong pagpamanhig. “Magrehistro kuno na siya og mga sakyanan so mao na’y atong gitan-aw nga posibleng motibo,†matud pang Dacua.
Target gyud nga patyon si Rodrigo tungod sa kadaghan sa giburak kaniyang bala apan swerte lang wala kaayo kini maklaro kay heavily tinted ang samin sa sakyanan. (Niña G. Sumacot ug Marvi Sardalla,USJ-R Intern/EIM) (BANAT NEWS)
- Latest
