Saksi sa kamatayon sa tomboy mitumaw

CEBU, Philippines - Mipatim-aw sa kapolisan ang saksi sa nahitabong pagpanglugos sa usa ka 19-anyos nga tomboy  kinsa sa samang  higayon  namaligya  og  newspaper  ug  barbeque  sa kadalanan  ning  dakbayan.

Ang hepe sa kapolisan sa City Intelligence Branch, Chief Insp. Romeo Santander mibutyag nga sa miaging hapon miadto ang saksi sa  ilang  buhatan  kinsa  mitug-an  nga  nakita  niya  ang  maong  hitabo.

Matud pa ni Santander nga ang tulo ka lalaking nagpahimulos sa tomboy nga si Quennie Marie Arriesgado nagpuyo  sa ilawom sa taytayan sa lugar  diin  pahimusli ang biktima una kini  patya.

Dugang pa ni Santander  nga kompirmadong rugby boys ang tulo ug posibling  migamit   kini  og rugby dihang   gilugos  nila  ang  biktima.

Wala usab isalikway ni Santander ang posibilidad nga gitulis ang biktima sa  kwarta  niini nga  gikan sa iyang  hinagoan.

Gipadayag usab ni Santander nga niadtong higayona sa wala pa ang  hitabo, gikatahong gi-atangan  sa tulo ka mga rugby boys ang biktima dayon gitabangan  kini  og  lugos  una  patya. Gibana-banang nagpangidaron ang mga rugby boys ug 18-anyos, 19 ngadto na  20-anyos nga giingong wala na sa ilang dapit.

Naglaum  ang kapolisan nga ilang masikop sa labing dali  nga panahon ang tulo aron makapanubag  kini sa  ilang  kasaypanan.

Kahinumdoman nga niadtong Sabado  pasado alas 5:00  sa kaadlawon  nakita  sa  usa  ka  conductor   sa PUJ  nga si Ramil Noynay ang  lawas sa  biktima  nga patay  na samtang  mitubag  kini  sa sugo  sa lawas  sa  may  kasagbotan atbang sa Mabolo Police Station.

Hinungdan nga dali kining nakapanawag og polis  ug didto nasuta nga usa diay ka babaye nga gihuboan sa iyang ubos nga sapot nga  wala  nay kinabuhi. (BANAT NEWS)