Kanhi MCWD chairman itudlong bag-ong pangulo sa CITOM

CEBU, Philippines - Ang kanhi tsirman sa Metro Cebu Water District (MCWD) nga si Ruben Almendras itudlo ni Mayor Michael Rama nga bag-ong tsirman sa City Traffic Operations Management (CITOM) Board.  Nakadayeg kaayo ang mayor dihang si Almendras mihimo og mga sugyot unsaon sa pagsulbad ang problema sa trapiko dinhi sa dakbayan sa Sugbo gikan karon ug sa umaabot pa nga katuigan.

Ang mayor mitambong sa tigum sa mga magpapatigayon kagahapon sa buntag diin si Almendras didto ‘sab og mipresentar sa iyang mga sugyot pagsulbad sa problema sa trapiko. Matud ni Rama nga nakadayeg kaayo siya sa presentasyon ni Almendras mao nga nahuna-huna niya nga tanyagan kini nga maoy mag-tsirman sa CITOM Board.

Daku kaayo ang pagsalig ni Rama kang Almendras nga mapalambo niya ang gimbuhaton sa CITOM tungod sa iyang mga kasinatian.

Taud-taud nga panahon nga si Almendras nahimong tsirman sa MCWD. Matud sa mayor nga wala usab magduha-duha si Almendras pagdawat sa iyang sugyot nga mahimong CITOM chairman. Lumad nga taga Danao si Almendras ug igsoon siya ni Vice Governor Agnes Magpale ug Cabinet Secretary Rene Almendras.

Sukad sa pag-resign ni Jack Jakosalem pagka tsirman sa CITOM Board kay milansar pagka konsehal, wala na g’yud motudlo pa si Rama og iyang hulip.  (/EIM)  (BANAT NEWS)