Kasong perjury gisang-at ni Sitoy batok Salud

CEBU, Philippines - Kasong perjury na usab ang gipasaka ni Cordova Mayor Adelino Sitoy batok kang boxing promoter Rex “Wakee” Salud  sa  Cebu Provincial Prosecutor’s Office.

Kini maoy  ikatulo nga kaso nga gipasaka ni Sitoy batok kang Wakee, Si Atty. Fillmore Gomos ,  abogado  ni Salud nagkanayon nga ang duha ka kasong perjury   ang  nasang-at   na  sa mga  korte  sa  Cordova and Lapu-lapu City.

Sa  iyang  kiha,  si Sitoy  miingon  nga ang  respondente  nakalapas  sa pagsuwat  og sayop  sa  iyang  ikaduhang aplikasyon  sa pag-usab  og  registration  record  gumikan  sa pagbalhin  sa  iyang  pinuy-anan. Kini  tungod  kay  matud niya nga sa ikaduhang application ni Salud siya miingon nga usa ka tuig ug 11 ka buwan  na siyang nagpuyo sa Cogon, Cordova hangtud  niadtong  Oktubre 31, 2012.

Si Salud kaniadto nag-file og certificate of candidacy sa Cordova sa iyang tinguha nga mudagan pagka mayor apan napakyas kini tungod sa pag question sa iyang residencia.

Niadtong Marso 29, 2012 si Salud mi-file sa iyang first application  sa pagbalhin sa iyang registration   ngadto  sa     Office sa Election Officer sa Cordova. 

Basi sa maong application nasuta ni  Sitoy nga  si Salud nagkanayon nga nagpuyo  siya  sa Cogon sulod  sa siyam  ka  buwan  gikan sa Hunyo 2011 hangtud Marso 29, 2012.

 Pero gi-deny ang iyang application  tungod kay   napakyas   siya  sa pagsuporta  og mga ebidensya  bahin  sa gidugayon  sa  iyang  pagpuyo.

Si Salud misang-at  pag-usab  sa  ikaduha  nga  aplikasyon  alang  sa pagbalhin  sa  iyang  rehistrasyon gumikan  sa pag-usab  og  pinuy-anan.

Apan matud ni Sitoy nga iyang nasayran  nga sa ika-duha  niya nga  aplikasyon  aduna kini kalainan sa unang  aplikasyon.

Si Gomos nagkanayon nga motubag sila sa maong pamasangil   sa higayong  madawat nila  ang  kopya  sa maong  kiha. (/WC) (BANAT NEWS)