Kaso sa pagpatay kang Konsehal banosong gisang-at na sa korte

CEBU, Philippines - Gipasaka na sa korte ang kasong murder batok ni Reynaldo Destacamento kinsa gipasanginlang mipatay kang Argao councilor Joaquin Banosong niadtong miaging buwan. Way girekomendar nga piyansa si State Prosecutor Ferdinand Collantes batok ni Destacamento, 32,  taga Barangay San Isidro, Talisay City, Cebu.

Si Banosong, 64, residente sa Barangay Talaga, Argao, Cebu, outgoing na nga konsehal sa Argao. Gipasaka ngadto sa korte ang kaso human wala mosumitir og counter-affidavit ang akusado. Niadtong Hunyo 3, 2013 si Banosong gipusil patay sa merkado publiko samtang padung na kini mosakay sa iyang sakyanan gikan nangompra.

Basi sa report, nakahiagum og samad pinusilan si Banosong sa iyang ulo ug patay na pag-abot sa tambalanan. Tulo ka adlaw human sa hitabo nadakpan si Destacamento sa Osmeña Blvd. sa Cebu City ug positibong gitumbok sa mga testigos nga mao ang tawong mipusil patay sa konsehal.

Ang kampo sa akusado misang-at og motion to dismiss complaint  ug miawhag sa korte sa pagpagawas og writ of habeas corpus tungod sa pasangil nga illegal ang paagi sa pagdakop kang Destacamento.

Matud ni Atty. Rex Fernandez nga gilapas sa kapolisan ang katungod sa iyang kliyente human gidakop nga walay warrant of arrest.  (BANAT NEWS)