Alambre nasagol sa gi-order nga pagkaon, kustomer mireklamo

CEBU, Philippines - Naputol ang kaon sa usa ka negosyanti human kini makakaon og electrical wire uban sa iyang gi-order nga pagkaon sa usa ka sikat nga Chinese fast food chain sa may Osmeña Blvd. sa barangay Sto. Niño pasado alas-12 kagahapon sa udto.

 Ang kustomer nga si Ignacio Posas Jr., nga taga dakbayan sa Mandaue ang midangop sa Waterfront Police Station tungod sa kasagmuyo niyang diriyot mabutang sa peligro iyang kinabuhi tungod sa maong alambre nga naa sa iyang pagkaong gi-order sa maong kan-anan.

Matud pa ni SPO2 Ulyses Ragasa sa Waterfront Police dihang nahinabi sa Banat News nahibulong na lang siya nga sa tanto niya og usap sa gikaon dunay nasangit nga hait nga butang diha sa iyang lagos.

Tungod niini, iyaha kining giluwa ug sa iyang pagsusi daan nga electrical wire ang iyang nakaon nga nasagol diay sa iyang pagkaon.

Hinungdan nga iya dayun kini nga gidangop ngadto sa manager sa maong fast food chain nga si Cindy Oniping apan gikatahong giingnan lamang si Posas nga ilisan lang ang iyang pagkaon.

Apan wala makauyon niini si Posas  maong iya kini nga gipa-blotter sa kapolisan.  Matud pa ni Ragasa buot ni Posas nga makighinabi sa labaw sa maong kan-anan aron pahimangnoan bahin sa dili maayong serbisyo nga iyang nadawat gikan kanila. (BANAT NEWS)