Kidnap-try napalpak

CEBU, Philippines - Naluwas sa tinong kamatayon ang negosyanteng magtiayon lakip na ang ilang anak dihang girakrakan ang ilang sakyanan diha sa Acacia St. Sacred Heart Banawa ning siyudad sa Sugbu.

Ang tag-iya sa sakyanan nga gipaulanan mao si Dr. Rico Medina kinsa kauban sa iyang asawa nga si Arlene, ug anak nga si Benjie ug ang ilang body guard nga si Allan Dake. 

Giingong pasado alas-12  sa tungang gabii, naabot diha sa may eskina sa dalan Acacia ang sakyanang Fortuner sa mga biktima dihang kalit kining gipaulanan og bala. 

Usa ka habal-habal driver nga nagdumili sa pagpahingalan nakabantay nga ang Fortuner gibabagan sa duha ka sakyanan nga Toyota Vios ug Toyota Innova.

Ang Vios maoy mibabag sa agianan samtang ang Innova mibabag sa luyo niini samtang ang mga sakay nagpunay og pusil sa Fortuner, swerteng nakamaniobra ang Fortuner nga gimaneho sa anak sa doktor ug nakalahos ngadto sa ilang subdivision. Ang gwardiya sa maong subdivision nga si Manolo Arenas, mipadayag nga nakadungog siya og butobuto ug nakit-an na lang niya ang naghaguros nga sakyanan ni Dr. Medina padung mosulod maong iyaha kining giablihan.

Wala siya’y nakit-ang sakyanang misunod sa mga biktima. Ang kapolisan gikan sa City Intelligence Branch, Punta Princesa Police ug Crime Scene Investigation mibutyag nga dunay unom ka buslot sa bala ang sakyanan sa mga Medina. Narekober sa crime scene ang lima ka kabhang ug usa ka slug sa gituohang kalibre .45.

Pipila ka oras ang milabay, ang kapolisan nakadawat og report kalabot sa abandonadong sakyanan nga Vios nga may temporary plate ug Innova diha sa may Happy Valley sa barangay Labangon.

Matud pa nga nag-andar ang maong sakyanan nga walay tawo ug naguba ang dulong sa Vios. Nakuha diha sa Innova ang kalibre .45 nga gituohang maoy gigamit sa pagpang-ambush sa biktima.

Pasado alas-7 sa buntag, nakadawat na usab  og taho ang kapolisan, human usa ka Toyota Grandia van nga nag-estambay atubangan sa usa ka karenderiya nga gipanag-iya sa usa ka Melben Gorgonio.

Matud pa ni Gorgonio nga pasado alas- 2 pa sa kaadlawon niya nabantayan ang maong van nga adunay plakang YEA-493 maong mitawag siya sa kapolisan. Dihang gisusi sa kapolisan, didto na nakita nga adunay tulo ka kalibre .45 nga armas,usa ka silencer, duha ka magazine ug bag nga adunay sulod nga bonnet, masking tapes ug uban pang mga gamit.

Ang hepe sa kapolisan sa Punta Princesa Sr. Insp. Chuck Barandog, mipadayag nga aduna sila’y mga gipangsubay nga anggulo susama na lang sa negosyo, pagpanulis ug posibling kidnapping.

Matud pa ni Barandog usa sa anggulo ang negosyo tungod kay si Dr. Medina maoy tag-iya sa Medina College sa Ozamiz City diin aduna kini unom ka mga tunghaan sa Mindanao.

Ikaduhang pagduda ni Barandog mao ang robbery hold-up ug kidnapping apan naguba ang plano sa mga criminal tungod sa pagsukol sa mga biktima.  Sa pakisusi sa Banat News sa online dictionary nga Wikipedia nasayran nga adunay unom ka tunghaan nga gipanag-iya ang biktima kini mao ang Medina College-Ipil; Medina College-Ozamis; Medina College Pagadian; Medina Foundation College; Medina College-Ilo-ilo ug Medina Science High School.

Matud pa ni Barandog nga lumad gyud nga taga Pagadian City ang pamilyang Medina ug aduna lang usab kini properties dinhi sa Sugbo. 

Ang hepe sa kapolisan sa dakbayan sa Sugbo, dako usab ang pagduda nga aduna gyuy tinguha nga kidnapon ang biktima tungod sa pamaagi niini sa pagkorner sa sakyanan.

Matud pa ni Natuel nga planado gyud ang maong pagpang-ambush tungod kay diha na man daan ang mga mamumuno.

Lakip sa imbestigahon ang migawas nga report nga ang ngalan ni Medina nalakip sa 23 Aman Futures Executives scam kansang bank accounts giingong gi-frozen sa Court of Appeals ug anaa usab kini lookout list sa Bureau of Immigrations. Atol sa panghitabo, gisuwayan sa mga tigbalita pagkuha ang habig sa mga biktima apan nagdumili una sila paghatag og pamahayag tungod kay giingong nakugang pa sila sa hitabo. (BANAT NEWS)