Pagpanguha og seahorse higpit gibantayan

CEBU, Philippines - Gialerto sa hunta probinsiyal sa Sugbo ang kalungsuran ug kabarangayan nga daplin sa kabaybayonan batok sa pagpanguha ug pagpamaligya sa kabayo-kabayo o seahorse sa kadagatan.

Kini isip suporta sa panawagan sa Bureau of Fisheries and Aquatic Resources nga ma-monitor ang maong ilegal nga kalihukan.

Usa ka resolusyon nga gipangamahanan ni Bokal Julian Daan kinsa maoy kasamtangang bise-gobernador nga nag-awhag sa mga hingtungdan nga itaho dayun sa mga awtoridad kung may masakpan nga manguha ug mamaligya sa mga kabayo-kabayo.

Ubay-ubay nga pinauga nga kabayo-kabayo ang nasakmit sa mga awtoridad sa Mactan-Cebu International Airport ug BFAR sa niaging buwan.

Nunot sa maong taho, si BFAR 7 regional director Andres Bojos nagkanayon nga anaa pa gihapon ang maong ilegal nga kalihukan bisan gihigpitan ang pagdili niini.

Base sa report sa Project Seahorse Foundation sa Bohol ug Sugbo niminus ang gidaghanon sa mga kabayo-kabayo human nakamatngon ang mga lokal nga mananagat nga ang pinauga niini mahalin sa tag P50 ngadto sa P70 ang matag usa o P14,000 ang matag kilo.

Ang kabayo-kabayo mabuhi sa mga sagbot sa kadagatan ug mga kabakhawan apan makuha usab kini pinaagi sa hayag nga suga diha sa mabaw nga bahin sa dagat sanglit magtoo sila nga hayag sa adlaw.

Ang pinauga nga kabayo-kabayo gamiton isip sagol sa tambal nga ginama sa mga Intsik.  (BANAT NEWS)