May relasyon - PNP

CEBU, Philippines - ‘I love you goodbye’ kini maoy nakasuwat sa card uban sa tulo ka mga buwak nga rosas nga giingong gipadala ni Kapitan Rey Oybenes ngadto ni Rahoma “Ramram’ Luague nga usa usab ka administrative assistant 6 sa Department for the Welfare of the Urban Poor (DWUP) sa Cebu City Hall niadtong Martes sa gabii.

Sila si Oybenes ug Luague parehong namatay niadtong Huwebes sa buwag nga mga dapit. Si Luague nakit-ang patay na nga may samad pinusilan sa dughan diha sa kasagbutan sa bakilid nga bahin sa sitio Curus-Curus sa barangay Cansumoroy sa lungsod sa Balamban.

Patay na usab si Oybenes dihang nakit-an sa sud sa government issued pickup diha sa sitio Tigbao sa barangay Talamban sa siyudad sa Sugbu ug duna usab siya’y samad pinusilan sa walang dughan sama sa kang Luague.

Si Luage, ang nabiyudang asawa ni anhing PO1 Noriel Luague nga namatay atol sa usa ka police operation batok sa grupo sa guns for hire nga gipangulohan ni Ramon Bacluhan diha sa barangay Cogon-Ramos, Cebu City niadtong 2007.

May relasyon

Sumala pa ni Sr. Supt. Mariano Natu-el, hepe sa Cebu City Police Office base sa nakuha nilang mga impormasyon gikan sa mga nakaila sa duha duna gyud sila’y relasyon sud na sa lima ka tuig.

Giingong gibuwagan na ni Luague si Oybenes niadtong Pebrero apan daw di makadawat ang naulahi. Si Natu-el miangkong wala gyud nila mahibaw-i kung unsay hinungdan sa panagbuwag sa duha. Ang asawa ni Oybenes nga si Jesebel, nga usa ka midwife, matud pang Natu-el mibutyag nga aduna na kini mga pagduda kaniadto sa iyang bana.

Maayong tawo

Apan gihulagway kini sa ginang nga usa ka maayong bana, responsableng amahan sa ilang anak ug maayo kining tawo. Matud pa nga sa milabay’ng semana daw nanugon kini nga dili gyud pasagdan ang ilang anak bisan og unsa pay mahitabo.

Matud pa ni Natu-el nga base sa ilang imbestigasyon misuway unta nga makigbalik si Oybenes kang Luague niadtong Martes sa gabii.

Samtang dako ang pagtuo sa medico legal sa kapolisan nga naghikog gyud Oybenes kini human sa iyang gipahigayong awtopsiya sa lawas niini sa miaging gabii.

Hikog gyud

Si Dr. Nestor Sator, mibutyag nga base ang samad pinusilan sa walang dughan ni Oybenes milapos ngadto sa likod nga walang bahin sa iyang lawas. Matud pa ni Satur nga adunay timailhan nga gituyo sa pagpusil ang kaugalingon ni Oybenes tungod sa pagkadul-it niini sa iyang pagpusil.

Apan giklaro ni Satur nga hingpit lang nga masayran kun naghikog ba gyud si Oybenes kun kini mogawas na ang resulta sa ilang gihimong paraffin test kang Oybenes ug ang ballistic exam sa bala nga nakuha sa crime scene.

Samtang sa autopsy kang Luague, si Sator miingon nga ‘downward’ o paubos ang direksyon sa bala sa calibre .45 gikan sa walang dughan niini. Usa ka slug sa maong bala ang nakuha nga miungot sa spinal column sa babaye. Ang mga kasing-kasing sa duha matud pa pulos naigo sa bala.

Giplano

Ang mga imbestigador miingon nga 90 porsiyento na silang kombinsido nga si Oybenes ang suspek sa pagpatay kang Luague kinahanglan pa una nilang paabuton ang paraffin test kang Oybenes, ballistic examination, crossmatching sa mga nakuhang ebidensya una pa mahingpit ang ilang teoriya.

Si Natu-el nagtuo nga planado kaayo ang pagpatay kang Luague , usa sa timailhan niini mao ang pagtangtang sa red plates ug ang sticker logo sa sakyanan nga grey Toyota Hi-Lux nga gigamit ni Oybenes. Gipulihan kini og “for registration.” Si Engineer Rolando Ardosa, sa General Services Office (GSO) miingon nga maong dugay nailhan ang gigamit nga sakyanan ni Oybenes tungod kay giilisan kini og temporary nga plate apan red plate na gayud ang gi-issue niini nga selyado gikan sa City Hall.

Gibutyag usab ni Ardosa nga si Mayor Michael Rama na maoy magbuot kung unsay buhaton sa sakyanan.

Ang igsuon ni Luague nga si Edna mibutyag sa mga tigbalita nga nakabasa siya sa text ni Oybenes diha sa cellphone sa iyang igsuon nga sa iyang tan-aw usa ka hulga.

Matud pa niini, mihulga si Oybenes nga maghikog kini ug apilon niya si Luague. Gikatahong miaslom na ang relasyon sa duha.

Mag-anhaan

Sa laing bahin, ang gwardiya nga si Jose Benavente, sa Cebu City Hillyland Dormitory diin magpuyo si Luague ug ang anak niining 8-anyos mikompirmar nga niadtong Huwebes sayong buntag gikuha sa kapitan si Luague uban sa bata ug sa katabang niini.

Matud pa ni Benavente nga mag-anhaan usab sa dormitory ang kapitan.

Si Natu-el miingon nga nianang Miyerkules sa gabii nakit-an si Oybenes sa gawas sa dormitoryo ug pagka-Huwebes sa buntag gikuha niini si Luague, anak sa ginang ug ang katabang. Giingong gibilin ang bata sa eskuylahan ug milakaw na ang duha sa wala hisayring dapit. Ang asawa ni Oybenes nga diha unta atol sa pag-awtopsiya sa lawas sa iyang bana, gisuwayan pa unta sa pagkuha sa iyang habig, apan igo lang kini nga milingo-lingo sa iyang ulo.

Ang kauban na niini maoy miatubang sa media ug mihangyo nga dili una kini motingog tungod sa kasakit sa nahiaguman sa iyang bana.

Mihangyo usab ang banay’ng Oybenes nga hunongon na ang paghisgot kabahin sa nahitabo.

Gihulagway sa kapolisan nga “crime of passion” o krimen ang nahitabo sa duha. (Lesley Caminade-Vestil ug report ni Jessa Celosia,CNU Intern/EIM) (BANAT BALITA)