Philippine Air Force misalmot sa Brigada Eskwela

CEBU, Philippines - Mga sakop sa Philippine Air Force misalmot sa "Brigada Eskwela" nga gipahigayon sa mga sakop sa DepEd uban sa mga ginikanan ug sa mga tinun-an sa dakbayan sa Lapulapu kagahapon.

Kagahapon, ang mga tinun-an, mga ginikanan ug mga magtutudlo nagtambayayong sa pagpanglimpyo sa ilang tagsa-tagsa ka tunghaan alang sa umaabot nga adlaw sa tingtungha karong Hunyo 3 ning tuiga.

Ang principal sa Mactan Air Base Elementary School (MABES) nga si Marilou Vallecera mibati og kalipay tungod sa pag-abot sa mga sakop sa PAF nga mitabang kanila. Nasayran nga dunay mga anak sa maong mga sundalo ang nagtungha usab sa maong eskuylahan.

Ang mga sundalo nanilhig ug namutol sa pipila ka mga kahoy palibot sa maong tunghaan aron mahayag-hayag ang palibot.

Ang Brigada Eskwela gilusad sa DepEd pinaagi sa motorkada sa 19 niini ka mga schools divisions sa tibuok rehiyon. Molanat og usa ka semana ang maong kalihokan nga gipaabot nga salmotan og mga volunteer groups gikan sa nagkadaiyang sektor. (BANAT NEWS)