Joavan napakyas sa pag-ikyas padung sa Negros

CEBU, Philippines - Human sa duha ka semanang pagtago-tago hingpit na usab nga nasikop ang gikonsiderar nga public enemy number one sa kapolisan pasado alas-9 sa buntag kagahapon diha sa usa ka beach resort sa barangay Saavedra sa lungsod sa Moalboal. Si Joavan Fernandez gidudahang padung na moikyas sa Negros luwan sa usa ka pumpboat gikan sa maong lungsod dihang natiktikan sa kapolisan.

Matud pa ni PO2 Stewart Bayang sa Moalboal police duha ka mga kauban ni Joavan nga sila si Benito Sellon ug Carlito Cañada ang nadakpan ug nakuhaan usab og mga armas nga kalibre .45.

Matud ni PO1 Neil Manongsong sa Moalboal Police station kinsa apil sa pagsikop kang Joavan alas singko pasado pa sa kaadlawon nila nadawat ang report gikan sa concerned citizen nga nagpahibawo nga mi-check in si Joavan sa maong resort.

Sa pag-abot sa mga polis sa lugar naabtan nila ang duha ka back up ni Joavan diha sa baybayon nagbantay sa duha ka dagkung pumpboat nga gituohang sakyan ni Joavan sa pag-ikyas gawas sa Sugbu.

Matud ni Manongsong ilahang gisirkulohan ang lugar ug gipaabot nila kini nga mogawas sa giabangang lawak.

Pagkaalas 9:00 sa buntag migawas na kini ug miduol sa iyang mga back ups diha sa baybayon ug diha na nila sila giduol.

Misuway pa unta og dagan ang tulo apan wala na sila’y nahimo tungod kay naalirungan  na sila sa mga polis.

Si Joavan nakuhaan gikan sa iyang posisyon og kalibre .45 nga armas nga dunay lima ka buhing bala sa magazine niini.

Base sa nakuhang taho sa kapolisan, alas dos pa kagahapon sa kaadlawon mi-check in sa resort si Joavan sakay sa usa ka Honda Fit nga adunay plakang JEY 738.

Giingong pangalan sa kauban ni Joavan ang nagpa-book sa  maong beach resort apan adunay nakamay-ong kaniya diha sa sud sa sakyanan.

Ang hepe sa kapolisan sa lalawigan sa Sugbo Sr. Supt Patrocinio  Comendador miingon nga idiretso nila sa Cebu Provincial Detention and Rehabilitation Center (CPDRC) ug dili sa lugar nga nasuhito na kini.

Si Comendador nagkanayon nga dili nila mamahimong ibutang si Joavan sa Moalboal tungod kay layo kini ug risgo ang pagbiyahe. Samtang risgo gihapon kun sa Talisay City tungod kay daghan kini og kaila nga posibleng motabang kaniya sa pag-eskapo.

Ang bag-ong napiling mayor sa Talisay nga si Johny delos Reyes miingon nga ihatag niya ang ganti nga iyang gisaad kun madakpan si Joavan.

Sutaon pa  kinsa’y tag-iya  sa sakyanan nga gisakyan ni Joavan ug ang giingong gipalit niyang duha ka pumpboats.

Si Joavan nga gikuhaan og habig igo lang kini nga miingon nga "akoa lang abogado estoryaha." (BANAT NEWS)