Sakyanan nawad-a’g preno 14 angol

CEBU, Philippines - Mikabat  sa 14 ka tawo  ang  angol dihang nawad-an  og  preno  ang  ilang  gisakyan  ug  nalimbuwad sa kimba    didto sa barangay Poblacion West, sa lungsod sa Moalboal niadtong Biyernes sa alas 7:00 sa gabii.

Usa  sa naangol  mao  ang drayber sa Pajero type nga sakyanan nga  si Eduardo Badayos, 43, minyo,  nga  taga barangay Cogon- Pardo siyudad sa Sugbo.

Ang  iyang  mga  pasahero  nga kauban  niyang  naangol  mao sila si Michael Casas, 19, Evelyn Badayos,17 , Eddie Boy Badayos, 15, Onen Gaballes, 18, Daisy Lyka Badayos, 14, Fritz Eduard Badayos, 13, Dave Adrian Badayos,  8, Kara Venice Ann Badayos, 7, Eduardo John Badayos, 6, Eduard Dann Badayos, 4 anyos, Chanice Badayos, 3 ug Eduard Zach Badayos 1 ka tuig nga pulos mga molupyo sa dakbayan sa Sugbo.

Si PO1 Melvin Delica sa Moalboal Police  Station   mibutyag  sa Banat News   nga  ang mga  biktima paingon na untang mopauli sa dakbayan sa Sugbo  gikan sa habagatang  bahin  sa lalawigan.

Apan samtang nagdagan kini  kalit  lang  nawad-an og  preno   hinungdan nga  wala  na  makontrol  sa drayber  ang  dagan  niini ug sa paningkamot   nga dili madasmagan  ang  iyang  gisundan  nga traysikol nga puno usab sa  pasahero  iya  kining gilihayan. Apan sa iyang  paglihay milahos  siya sa daplin  sa karsada  nga kimba   hinungdan  nga nalimbuwad  kini    nga  misangpot   sa pagkaangol sa mga sakay.

Hinuon daling nahatud   ang  tanan  ngadto  sa Badian District  Hospital ug  luwas  gikan  sa kakuyaw. (BANAT NEWS)