Supporter napusilan
CEBU, Philippines - Usa ka giingong supporter sa usa ka kandidato pagkamayor sa Tuburan ang naangol human gipusil sa wala mailhing mga lalaki samtang kini ug iyang kauban nagsakay og motor aron kuyogan ang gidalang Precinct Count Optical Scan (PCOS) Machine padung sa barangay Sumon sa lungsod sa Tuburan.
Si Sr. Insp. Florendo Fajardo, hepe sa Tuburan police station nga gikahinabi sa Banat News miila sa giingong napusilan sa walang tiil mao si Jovanni dela Cerna Puno.
Base sa imbestigasyon, si Puno sumala pa ni Fajardo, tigpaluyo kini ni mayoralty candidate Rose Suezo, nangangkong padung kini sa barangay Sumon aron eskortan ang PCOS machine apan pag-abot sa utlanan sa maong barangay ug barangay Tagbuaya dunay usa ka lalaking kalit nga mipusil kanila.
Si Puno giingong gidala sa usa ka tambalanan sa Cebu City, atol ning pagsulat sa balita, padayon pang nagpaabot ang kapolisan pagpatim-aw sa drayber sa motorsiklong gisakyan ni Puno aron mohatag og pamahayag.
Matud pa ni Fajardo, dihang ilang gisusi ang lugar nga nahitaboan mingaw kini ug ilaha usab nasuta nga wala pa gibiyahi ang PCOS machine alang sa maong barangay. (BANAT NEWS)
- Latest
