Parojinog rob gang nasigpatan apan nakaipsot

CEBU, Philippines - Lima ka mga gidudahang sakop sa Parojinog Robbery Group ang ligas ra nga nakaipsot gikan sa mga polis human gironda sa hiniusang pwersa sa Waterfront Police Station, Special Weapons and Tactics ug City Intelligence Branch sa Cebu City Police Office niadtong Biyernes sa gabii.

Ang grupo nga gituohang gipangulohan ni Aylon Parojinog gidudahang maoy nag-abang sa lawak sa usa ka pension house diha sa dalan Manalili nga gironda sa kapolisan tungod sa tip sa usa ka impormante.Apan wala na maabti pa sa kapolisan ang maong mga lalaki, gibiyaan sa grupo ang ilang mga personal nga gamit sama sa mga sinina ug nag-andar pa ang air-condition unit sa maong lawak dihang gisud sa mga polis.

Una niini, si Chief Insp. Wildemar Tiu, hepe sa Waterfront Police Station nakadawat og impormasyon kalabot sa presensya sa kadudahang mga lalaki nga nag-abang sa maong pension house.Pabilin ang pagpangita sa kapolisan sa grupo kinsa gidudahang gipaluyohan og politiko aron makatigom og campaign funds. Ang grupo napalpak sa ilang plano tungod sa presensya sa usa ka patrolcar sa luyo sa van nga ilang gisuwayan og gamit isip getaway vehicle. Diha sa van na-recover ang daghang mga tag-as nga kalibre sa armas, mga bala, granada, martilyo, cutter ug uban pa.  (BANAT NEWS)