Kadaugan sa Mactan gihugopan sa liboan ka tawo

CEBU, Philippines - Gihugopan sa kaliboan  ka  mga  misaksi   nga  lokal  ug   langyaw nga mga turista ang  reenactment kon buhing  paghulagway sa “Kadaugan sa Mactan”  sa daplin sa baybayon sa barangay Mactan, dakbayan sa Lapulapu  kagahapon.

Ang naglagiting nga kainit   sa adlaw wala makapugong sa  mga tawo nga misaksi sa maong pasundayag nga gisalmotan  sa gatusan ka mga eskrimador nga mga Sugboanon nga gipangulohan  sa duha ka mga aktor nga sila  si Polo Ravales ug Troy Montero.

Si Ravales maoy nagdala sa papel ni Lapulapu ug gidala usab ni Montero  ang papel ni Magellan ug ang aktres nga si Yam Concepcion mao usab ang nagdala  sa papel ni  Rayna Bulakna nga asawa ni Lapulapu.

Si Regional Director Cynthia Lazo sa Department of Tourism (DOT) 7 nga maoy  pinasidunggang mamumulong sa maong kalihokan miingon nga ang makasaysayanong panghitabo sa dakbayan angay   gayud nga mapreserbar.

Gitataw niya nga sama sa mga ginama nga produkto sa maong dakbayan nga naglakip na sa mga pagkaon ,ang bayanihong buhat sa mga lumad nga Oponganon angay  nga magpabilin ug maampingan  sa mga molupyo sa dakbayan.

Samtang si Mayor Paz Radaza sa iyang pagpamulong sa pagbukas sa maong kalihokan nagpasalamat  siya  sa mga molupyo sa dakbayan  tungod sa gihatag  niini nga suporta sa ikaduhang kadaugan nga naangkon.

Si Radaza miingon nga ang iyang  pagkiha  ngadto  sa ahensya  sa kagamhanan  batok  sa usa  ka  TV commercial nga nagbugalbugal sa panag-engkuwentro ni Lapulapu ug Magellan ug pagsanong usab sa mga tagdumala sa usa ka kompaniya sa diaper, iyang giisip nga ikaduhang kadaugan sa mga Oponganon.  (BANAT NEWS)