Level 2 drug pusher sa Tangke sikop
CEBU, Philippines - Nasikop sa kapolisan ang usa ka level 2 drug pusher sa barangay Tangke ,dakbayan sa Talisay atol sa gipahigayong buy bust operation sa Regional Anti-illegal Drugs Special Operation Task Group sa miaging gabii.
Ang nasikop nailhan nga si Ritchie Labajo Cerna, 38, nga molupyo sa sitio Tungan sa maong barangay, kinsa giingong ilado nga pusher og shabu sa maong dapit.
Sa pakighinabi sa Banat News sa team leader sa maong operasyon nga si Sr. Insp. Henrix Bancoleta, nasayran nga gibato sila sa mga silingan sa suspetsado kinsa nasuko nga ilang gisikop si Cerna.
Una masikop ang suspek, usa ka poseur buyer sa kapolisan mipalit bale og P500 nga shabu gikan sa suspek ug human ikatunol niini ang shabu dayon gidawat usab niya ang tibuok P500 nga cash nga bayad, diha-diha giposasan siya sa kapolisan.
Matud pa ni Bancoleta nga una sila molampos sa pagsikop sa suspek, milanat usab og usa ka semana ang ilang pagpaniid niini. Midugang siya nga segun sa nadawat nilang taho mahalinan si Cerna og tag P200 mil kapin kun kulang matag semana hinungdan nga giisip siya nga level 2 drug pusher.
Nasakmit gikan sa suspek mao ang 19 ka gagmay’ng pakete, usa ka large pack ug duha ka medium pack sa shabu nga gibana-banang mokantidad og kapin kun kulang P200 mil. (BANAT NEWS)
- Latest
