Joavan ‘namusil’ apan mayor Soc midepensa sa anak

CEBU, Philippines - Naukay na usab karon ang dakbayan sa Talisay human ang anak ni Mayor Socrates Fernandez nga si Joavan Fernandez gipasanginlang namusil sa magbalantay sa usa ka car shop kagahapon sa alas 12:30 sa kaadlawon diha sa Cebu South Coastal Road habig sa barangay San Isidro, dakbayan sa Talisay.

Ang biktima mao si Eduardo Largo Jr., 36, taga sitio Isla Verde sa nahisgutang barangay ug tigbantay sa Danryan Marketing, usa ka car shop sa lugar.

Ang maong car shop gipanag-iya ni Jun Causon, manghod ni SPO1 Edgar Causon. Si Largo nakaangkon og samad pinusilan sa ibabaw’ng bahin sa tuong bukton daling gidala ngadto sa Talisay City District Hospital apan gibalhin ngadto sa Vicente Sotto Memorial Medical Center.

Na-recover sa mga polis diha sa lugar nga nahitaboan ang parte sa “jacket slug” nga gituohang gikan sa pusil sa suspetsado.

Sa imbestigasyon nila ni SPO1 Causon ug PO2 Evie Espina nga sa wala pa mahitabo ang pagpamusil si Joavan giingong angkas sa usa ka motorsiklo ug nagsabay-sabay diha sa car shop tulo ka higayon.

Ug pagka-upat nga balik giingong mi-counter flow sa traffic ang motorsiklo ug mihunong diha atubangan sa car shop ug nanaog si Joavan ug nangutana kang Largo sa mga numero sa telepono sa tag-iya sa car shop.

Apan namalibad si Largo nga wala siya kahibalo sa phone number sa tag-iya ug giingong nasuko si Joavan ug mihulbot kini og pusil dayon pusil ngadto sa biktima katulo ug maayo gani usa lang ang igo niini.

Human sa maong pagpamusil si Joavan mibalik og angkas sa motorsiklo dayon sibat.

Si Mayor Fernandez nanalipod sa iyang anak ug nagkanayon nga atol sa pagkahitabo mi-check in si Joavan sa Queensland Hotel sa barangay Mohon ug mi-checkout alas 9:00 na sa buntag kagahapon ug dunay record niini diha sa hotel ug giingong dunay tawo nga makapamatuod nga si Joavan diha ra sa hotel dihang nahitabo ang pagpamusil.

Matud sa mayor nga ang gisakyan sa iyang anak nga sakyanan sa pagsulod ug paggawas sa hotel usa ka Isuzu nga kolor puwa. Ang mayor nagkanayon nga mipadangat siya og mensahe sa text ngadto kang Joavan nga mopakita sa mga polis aron limpiyohan ang pangalan niini kabahin sa nahisgutang pasangil.

Gibutyag niya nga nagkaestoryahanay sila ni Joavan kagahapon sa buntag ug gihimakak sa iyang anak ang maong pasangil batok kaniya.

Sa laing bahin, si Superintendent Elmer Lim, officer-in-charge sa Talisay City Police Station nagkanayon kini nga nagpahigayon sila og hot pursuit operation batok kang Joavan.

Si Lim nagkanayon kini nga si Joavan dili lang “election threat” hulga na kini sa kahusay ug kalinaw sa siyudad kaniadto pa bisan wala pay eleksiyon.

Gibutyag ni Lim nga nagkaestoryahanay na sila  sa mayor ug gihangyo niya kining i-surrender si Joavan.Nanawagan siya sa publiko pagsumbong sa kapolisan kun ilang makita si Joavan.

Sa report sa TV Patrol Central Visayas kagahapon, matud pa mitawag si Joavan sa DyAB Abante Bisaya ug mihimakak sa pasangil ug mipasangil nga may bulok politika ang pagpasangil kaniya.

Sa laing bahin usab, si City Administrator ug Alayon campaign manager nga si Richel Bacaltos nagkanayon nga ang giingong gikalambigitan sa anak sa mayor dili makaapekto sa pagpangampanya sa grupo.

Matud ni Bacaltos nga si Joavan dili lakip sa ilang mga campaign crew ug wala kini kalabutan sa kampanya. (Brenda D. Batuto/EIM) (BANAT NEWS)