TCC president matangtang tungod sa "politika"

CEBU, Philippines -Giingong tungod sa politika ang presidente sa Talisay City College nga si Tomas Ramos tangtangon sa maong tunghaan.

Apan ang maong report gihimakak ni Talisay City Administrator Richel Bacaltos ug campaign manager sa Alayon.

Niining ulahi lang dunay mikatap nga mensahe sa text nga nagpasangil ni incumbent Congressman Eduardo Gullas kinsa mikandidato isip mayor sa Talisay karong eleksiyon sa Mayo nga giingong mihangyo kang Ramos nga pabutaron ngadto kaniya ang mga estudyante sa maong tunghaan.

Apan si Ramos giingong namalibad nga dili siya makabuot sa gusto sa mga estudyante kung kinsay ilang pilion.

Sa maong pagbalibad ni Ramos giingong dili na i-renew ang kontrata niini diha sa tunghaan. Hinuon gawas sa maong isyu giingong si Ramos over-qualified na ang edad niini gani retirable na tungod kay lapas na kini sa 65-anyos.

Ug gikataho usab nga dunay mga ginikanan ang giingong direktang mireklamo ngadto kang Gullas batok kang Ramos tungod sa sobra ka estrikto sa patakaran niini sa pagdumala niya sa TCC.

Si Bacaltos mipasabot nga si Ramos "quo-terminos" kini ubos sa administrasyon ni Mayor Socrates Fernandez ug matag tuig mag-renew sa iyang kontrata niining tuiga gikan sa Enero ngadto sa Hunyo 30 lang ang kontrata niya.

Ang mopuli nga mayor na usab ang magbuot kung kinsa ang iyang pilion nga molingkod isip presidente sa TCC isip head sa Board of Trustees sa TCC ug lakip ang mga magtutudlo sa maong tunghaan ubos usab sa kontrata ang ilang serbisyo ug renewable matag tuig.

Ang mga kontrata sa mga magtutudlo sa tunghaan napupos kini niadtong Marso 31, 2013. Ang kabahin sa mensahe sa text si Bacaltos nagkanayon kini nga imposible nga buhaton sa kongresista ang maong pasangil tungod kay dili kini usa ka mabaw nga tawo.

Ang mga tigbalita nagpanon ngadto sa buhatan ni Ramos aron makuhaan kini og pamahayag kabahin sa maong isyu apan wala kini didto. (Brenda D. Batuto/EIM) (BANAT NEWS)