Salinas Drive hawanan sa taga City hall

CEBU, Philippines - Ang mga sakop sa Cebu City Hall clearing team mohugpa karong buntag   sa Salinas Drive sa Barangay Lahug aron hawanan  ang aseras nga gigamit  isip baligyaanan sa mga pagkaon.

Matud ni Raquel Arce nga maoy hepe sa Prevention Restoration Order and Beautification Enchancement (PROBE) nga walay mahitabo nga gubot kun dili mosukol ang mga hingtungdan.

Gibisitahan na ni Arce ang maong dapit kagahapon ug personal nila nga giawhag ang katawhan, kang kansang kabalayan anaa mahimutang sa daplin sa karsada, nga dili moabuso.

Si Arce nagkanayon nga daghan kaayo nga reklamo nga nadawat sa ilang opisina kay ang mga tawo dili na makaagi sa aseras tungod sa mga lamesa sa lainlaing baligya.

Si Mayor Michael Rama nagkanayon nga dili siya mobabag sa pagahimoong clearing operation tungod kay gitumong kini alang sa kaayohan sa kadaghanan. Ang kadagkoan sa Department of Public Works and Highways (DPWH) pinaagi ni District Engineer Nicomedes Leonor mipasidaan na sa maong mga tawo nga nagpuyo sa daplin sa karsada nga apektado sila sa pagpalapad sa aseras.

Mga lumulopyo sa maong dapit misuwat ug nagpakitabang sa mga konsehal apan ang ilang hangyo nga iangan-angan ang pagpalapad sa aseras, gitugyan ra sa konseho sa DPWH.

Ang usa ra ka bahin sa karsada maoy adunay aseras kay ang kilid nga bahin sa Technical Education Skills and Development Authority (TESDA) walay lugar nga kahimoan og aseras.

Giplano ni Mayor Rama nga hangyoon niya ang mga opisyal sa Kapitolyo nga maoy tag-iya sa yuta ingon man ang tagdumala sa TESDA nga gahinan og aseras ang maong dapit aron dili mamilegro ang mga tawo nga anha na maglakaw sa karsada.  (BANAT NEWS)