Abellanosa ipatangtang sa katungdanan?

CEBU, Philippines - Human  sa 46 diyas  nga kapakyas  sa usa  ka konsehal  sa dakbayan  sa Sugbo  sa pagtubag  sa mga  pasangil  nga  gipasaka  batok  kaniya,  ang  kihante  mirekomendar  sa Malacañang  nga  ipatangtang  na  kini  gikan  sa  iyang  katungdanan.

Gawas  sa pagpahubo  sa iyang  katungdanan,  si  manlalaban Aristotle B. Batuhan  miawhag  usab  sa Malacañang  nga  pasakaan  og  kasong  kriminal  si  Konsehal Rodrigo Abellanosa  sa dakbayan  sa Sugbo.

Kini  may labot  sa kasong  grave  misconduct prejudicial to the service, grave  abuse  of authority, patent  dishonesty,  ug  dereliction  of  duty nga  gipasaka  ni  Batuhan  batok kang  Abellanosa.

Sa  kopya  sa rekomendasyon  ni  Batuhan  ngadto  sa Malacañang  kalabot  sa  resolusyon  sa kaso  ni  Abellanosa  nga  gipahat  sa Banat News, iyang  gibatbat  nga  ang  tanan  nagsukad   sa kapakyas   sa   respondent  sa  pagtuman  sa mando  sa Buhatan  sa Presidente  sa nasud nga gipetsahan  og  Enero 31, 2013  sa  pagpatubag  kang  Abellanosa  sa  mga  kasong gisang-at  kaniya  sulod  sa l5 diyas , gikan  sa maong  petsa.

Apan  niadtong  Pebrero  28, segun pa  ni  Batuhan  mihangyo  si  Abellanosa    nga  hatagan  una  siya    og  laing  15  diyas nga  lugway   o hangtud  sa Marso  15, 2013  sa  iyang  tubag  ngadto  sa buhatan  sa Presidente.

Apan  matud  pa  ni  Batuhan  nga  milanat  na  og  46  diyas  hangtud karon  sukad  madawat  sa respondent  ang  mando  sa  pagpatubag  sa  mga  kiha  batok  kaniya, napakyas  si Abellanosa  sa pagtuman  niini.

Gumikan  niini  naaghat  si Batuhan    sa pagrekomendar  nga  resolbahon  na  ang  maong  kaso  gumikan  sa  pagdumili  sa  respondent  sa pagtubag  sa  mga  pasangil  nga gipasaka  batok  kaniya.

Usa  sa  mga kasong giatubang  ni Abellanosa  mao  ang  giingong  pagsuyop  niini  sa  kinabag-ang  scholar  nga estudyante  sa kagamhanan sa dakbayan  sa Sugbo  pinaagi  sa pagpatungha  niini  sa iyang  kaugalingong  eskuylahan  nga  mao  ang Asian College  of Technology. 

Ang  rekomendasyon  ni  Batuhan  alang  sa pagresolba  sa maong  kaso  ug  sa pagpatangtang  kang  Abellanosa  gikan  sa katungdanan gipadala  ngadto  sa Malacañg  niadtong  Abril 1, 2013. (BANAT NEWS)