DA mosuporta sa LGU nga awardee sa Galing Pook program

CEBU, Philippines - Gipasalig  sa kagamhanang nasudnon   nga padayong  suportahan ang  mga local nga  kagamhanan  sa  mga  lugar  nga  napiling awardee  “Galing Pook” program.

Dinhi  sa Central  Visayas  gisuta  pa ang  mga  lungsod, syudad  ug lalawigan  nga nahimong  Galing  Pook awardee.

Ang maong  pasalig  gihimo  ni  Kalihim Proceso Alcala  sa Department of Agriculture (DA) kinsa  miingon  nga  labing palambuon  niini  ang  mga  panginabuhi  sa  mga  mag-uuma  ug mananagat  sa maong  mga  lugar.

Matud pa  ni  Alcala  nga  gawas  sa  mga  panguma  ug  panagat  hatagan  pa  niya  og  dakong  kahigayonan  ang  maong  mga  lugar    nga  makapahimus  sa tabang  alang  sa ilang  mga  proyekto sa  agribusiness.

Ang maong  pasalig  gihimo  ni Alcala  sa usa  ka forum  didto  sa kaulohan nga  gitambongan  sa  mga  local  government  chief  executive  sa  mga  lungsod  ug  dakbayan  nga awardee  sa Galing  Pook.

Ang  Galing Pook  program gipasiugdahan  sa Land  Bank  of the Philippines  uban  sa pagtambayayong  sa Galing Pook Foundation nga maoy  miila  sa  mga  local government  unit  nga nadumalahan  pag-ayo  sa ilang  mga  lokal  nga  opisyal  kinsa  malampuson  kaayo  sa pagpatuman  sa  mga moderno  nga  socio-economic development  project  nga  mihatag  og  kauswagan  sa panginabuhi  ug  pagpuyo  sa  mga  mag-uuma, ug  mga  mananagat  sukad  sa ilusad  ang maong bangga niadtong tuig 1993.

Gipahayag  ni  kalihim  Alcala nga unahon  sa DA pag-atiman  ang  mga  agri-fishery project diin  ang  mga  LGU manginlabot  usab  sa  pag-amot  sa equity  niini.

Matud  pa  niya  nga  gusto  sa DA nga may   equity ang  usa  ka  LGU nga  awardee  sa Galing Pook  aron  ang  mga  mag-uuma  ug mananagat  sa maong  mga  lugar labing  magiyahan sa LGU sa  pagpauswag sa  ilang  panginabuhi  nga  nagkahulogan  sa kamalambuon sa usa  ka  lungsod, dakbayan  ug  lalawigan sa natad  sa agrikultura. (BANAT NEWS)